Money9: 24 વર્ષની શીતલની પહેલી નોકરીનો પહેલો મહિનો ઉત્સાહમાં કેવી રીતે પસાર થઈ ગયો..ખબર જ ન પડી…ત્યારબાદ પહેલો પગાર મળવાનો જે આનંદ હતો તેનું શબ્દોમાં વર્ણન કરવું શીતલ માટે મુશ્કેલ છે…પણ યાદ રહે કે પૈસો જવાબદારી પણ લાવે છે. પહેલો પગાર મળતાની સાથે જ શીતલ ગણતરી કરવા લાગી કે આ પૈસાનું શું-શું કરવું.
બધા ખર્ચાઓ વિશે વિચાર્યા પછી, તેને લાગ્યું કે તે દર મહિને કેટલાક પૈસા બચાવી શકે તેમ છે. આવા સંજોગોમાં તેને થયું કે આ પૈસાથી દર મહિને ક્યાંક રોકાણ કેમ ન કરવું? પરંતુ રિસર્ચ કરવાથી તેને એટલા બધા રોકાણના વિકલ્પો મળ્યા કે તે મૂંઝવણમાં પડી ગઈ કે શું કરવું…આવી સ્થિતિમાં તેના એક વરિષ્ઠ સહયોગી અતુલે તેને મ્યુચ્યુઅલ ફંડમાં રોકાણ કરવાની સલાહ આપી… પરંતુ વાત અહીં એટલા માટે અટકી ગઇ કારણ કે આ તેની પ્રથમ નોકરી હતી.. બિલકુલ શરૂઆતી કમાણી છે.. આવી સ્થિતિમાં કેવી રીતે મ્યુચ્યુઅલ ફંડમાં રોકાણ કરવું જોઈએ?
જો તમારી પાસે પણ નવી નોકરી છે અને ક્યાં રોકાણ કરવું તે અંગે મૂંઝવણમાં છો, તો તમારે અમારો આ વિડિયો અવશ્ય જોવો જોઇએ.
ફાઇનાન્સિયલ એક્સપર્ટ્સ કહે છે કે સૌ પ્રથમ શીતલ જેવા યુવા રોકાણકારે સિસ્ટમેટિક ઇન્વેસ્ટમેન્ટ પ્લાન એટલે કે SIP દ્વારા મ્યુચ્યુઅલ ફંડમાં રોકાણ કરવાનું શરૂ કરવું જોઈએ… SIPમાં તમે દર મહિને 100 કે 500 રૂપિયા જેવી નાની રકમથી પણ રોકાણની શરૂઆત કરી શકો છો.
મ્યુચ્યુઅલ ફંડમાં પણ વિવિધ ફંડ હાઉસની ડઝનબંધ સ્કીમ્સ છે. હવે પ્રશ્ન એ છે કે આમાંથી પસંદગી કેવી રીતે કરવી? તો કોઇ સ્કીમ પસંદ કરવામાં, ઉંમર, નાણાકીય લક્ષ્યો, જોખમ લેવાની ક્ષમતા, આવક જેવા ઘણા પરિબળો ધ્યાનમાં રાખવાના હોય છે.
આ પરિબળોને ધ્યાનમાં રાખીને, તમારે ટોચના ફંડ હાઉસની કેટલીક બેસ્ટ સ્કીમ વિશે સારીરીતે રિસર્ચ કરવું જોઈએ. SIP દ્વારા રોકાણ કરવું એ એક ખૂબ જ અનુકૂળ રીત છે, જેમાં દર મહિને તમારા બેંક ખાતામાંથી નાણાં આપમેળે કપાઈને રોકાણ થતું રહે છે.
આમાં સૌથી ફાયદાકારક વાત એ છે કે રૂપી-કોસ્ટ એવરેજિંગનો ફાયદો મળે છે, એટલે કે બજાર પર નાની વધઘટની વધુ અસર નથી થતી અને ક્યારે રોકાણ કરવું તેનું ધ્યાન નથી રાખવું પડતું.
તમે જેટલું વહેલું SIP માં રોકાણ કરવાનું શરૂ કરશો, તેટલો વધુ ફાયદો તમને મળશે… વહેલું રોકાણ કરવાનું શરૂ કરવાથી, કમ્પાઉન્ડિંગ એટલે કે ચક્રવૃદ્ધિની અસરથી તમારુ રોકાણ વધતું રહે છે.
નોકરીની શરૂઆત કરનારા યુવાન જ હોય છે, તો આવા લોકો કોઈપણ ઇક્વિટી ફંડના લાર્જકેપ, મિડકેપ અથવા સ્મોલકેપ ફંડમાં નાણાંનું રોકાણ કરી શકે છે. એટલું જ નહીં, તેઓ લાંબા ગાળા માટે થીમેટિક ફંડ્સમાં પણ પૈસા રોકવાનું જોખમ લઈ શકે છે. જો તેઓ ઈચ્છે તો તેઓ તેમના પોર્ટફોલિયોમાં કેટલાક ડેટ ફંડ્સ, હાઈબ્રિડ ફંડ્સ પણ રાખી શકે છે જેના જોખમ ઘટી જશે.
મનીફ્રન્ટના CEO અને સહ-સ્થાપક મોહિત ગંગ કહે છે કે પ્રથમ નોકરીની સાથે સાથે એ પણ સુનિશ્ચિત કરવું જોઈએ કે દર મહિને થતી બચતના ઓછામાં ઓછા 20 ટકા SIP દ્વારા મ્યુચ્યુઅલ ફંડમાં રોકાણ કરવામાં આવે. આ હિસ્સાને ધીમે-ધીમે વધારવાના પ્રયત્નો કરવા જોઈએ જેથી કરીને લાંબા ગાળે સારું કોર્પસ તૈયાર કરી શકાય.
હવે એ પણ જાણી લો કે મ્યુચ્યુઅલ ફંડ પર ટેક્સ કેવી રીતે લાગે છે. ઇક્વિટી ફંડના કિસ્સામાં, જો તમે એક વર્ષની અંદર ફંડના યૂનિટ્સને રિડીમ કરો છો, તો તેના પર 15 ટકાના દરે ટેક્સ લાગે છે. એક વર્ષ પછી રિડમ્પશન પર, તમારે 10 ટકાના દરે લોંગ ટર્મ કેપિટલ ગેઈન ટેક્સ ચૂકવવો પડશે. એક નાણાકીય વર્ષમાં 1 લાખ રૂપિયા સુધીના લોંગ ટર્મ કેપિટલ ગેઇન પર કોઈ ટેક્સ નથી લાગતો.
બીજી બાજુ, જો ડેટ ફંડ્સ વિશે વાત કરીએ તો, 1 એપ્રિલ, 2023 થી લાગુ થયેલા નવા નિયમો અનુસાર હવે તેમાં લોંગટર્મ કેપિટલ ગેઇન પર ઇન્ડેક્સેશનનો લાભ નથી મળતો. હવે કોઈપણ સમયગાળાના રિટર્નને શોર્ટ ટર્મ ગેઇન માનવામાં આવશે અને તેની પર રોકાણકારે પોતાના ટેક્સ બ્રેકેટ મુજબ તેના પર ટેક્સ ચૂકવવો પડશે.
જો કે, નિષ્ણાતો એમ પણ કહે છે કે નવા રોકાણકારોએ માત્ર મ્યુચ્યુઅલ ફંડના ભરોસે બેસી રહેવાના બદલે FD, PPF, ગોલ્ડ વગેરેમાં રોકાણ કરીને એક બેલેન્સ્ડ અને ડાયવર્સિફાઇડ પોર્ટફોલિયો બનાવવાનો પ્રયાસ કરવો જોઈએ.
એકંદરે, કહીએ તો નવા રોકાણકારો માટે રોકાણની ઘણી તકો ઉપલબ્ધ છે… આવી સ્થિતિમાં, સૌ પ્રથમ બજેટ બનાવો અને જુઓ કે તમે કેટલું રોકાણ કરી શકો છો. ત્યારબાદ નાણાકીય સલાહકારની મદદથી રોકાણનું પ્રથમ ડગ માંડો.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો