Money9: સર્વેશ પોતાને બહુ ચાલાક ઇન્વેસ્ટર માને છે. એકથી એક નવા શેર કે મ્યુચ્યુઅલ ફંડને શોધતો રહે છે. તે કંઇક અલગ એટલે કે દરિયામાંથી મોતી શોધવા પર ભાર મૂકે છે. પરંતુ ઘણીવાર તેનો દાવ ઉલટો પણ પડી જાય છે.
મ્યુચ્યુઅલ ફંડ્સની દુનિયામાં ઘણાં એવા થીમેટિક ફંડ છે જે એકમાત્ર અને અનોખા છે. એટલે કે કોઇ એક ફંડ હાઉસે જ આ પ્રકારનું ફંડ માર્કેટમાં ઉતાર્યું છે. આ ફંડ્સ અંગે ઘણાં ઓછા લોકો જાણે છે. તમારા માટે આ ફંડ્સ અંગે જાણવું જરૂરી છે કારણ કે એવું ન થાય કે જેને સર્વેશ જેવા રોકાણકારો હીરો સમજતા હોય તે સામાન્ય પથ્થર સાબિત થાય.
ઇક્વિટી થીમેટિક ફંડ કેટેગરીમાં આમ તો ઘણાં ફંડ આવે છે, જેમ કે ESG funds, MNC funds, PSU થીમેટિક ફંડ્સ, ડિવિડન્ડ યીલ્ડ ફંડ્સ પરંતુ ઘણાં એવા ફંડ છે જે પોતાની રીતે અલગ જ છે. ઉદાહરણ તરીકે ટોરસ એથિકલ ફંડ અને ટાટા એથિકલ ફંડ ફક્ત શરિયાને અનુકૂળ હોય તેવા શેર્સ કે સાધનોમાં રોકાણ કરીને મીડિયમથી લોંગ ટર્મમાં સારુ રિટર્ન અપાવવાની કોશિશ કરે છે. તેમના માટે S&P BSE 500 શરિયા ઇન્ડેક્સ અને Nifty 500 શરિયા TRIને બેંચમાર્કની જેમ ઉપયોગ કરવામાં આવે છે.
શરિયા અનુકૂળ મ્યુચ્યુઅલ ફંડ હકીકતમાં ફક્ત એવી કંપનીઓમાં રોકાણ કરે છે જેનો બિઝનેસ મુસ્લિમોના શરિયા કાયદા અનુસાર નૈતિક માનવામાં આવે છે. જો કે તેમાં કોઇપણ ધર્મના લોકો રોકાણ કરી શકે છે. તે જ રીતે તાજેતરમાં એડલવાઇઝે IPO ફંડ લોન્ચ કર્યું છે. આ એક એવી રોકાણ થીમ છે જેમાં હાલમાં જ લિસ્ટેડ કંપનીઓ કે IPO લાવનારી કંપનીઓમાં રોકાણ કરવામાં આવે છે. આ ફંડ ખાસ કરીને નવા જમાનાના બિઝનેસવાળી સ્મોલ અને મિડકેપ કંપનીઓમાં રોકાણ કરે છે જેથી તેમાં થતા સારા ગ્રોથનો ફાયદો મળી શકે.
એક બીજુ ફંડ છે એક્સિસ સ્પેશિયલ સિચ્યુએશન ફંડ. જે ફંડ એવી કંપનીઓમાં રોકાણ કરે છે જેના શેરનો ભાવ કોઇ ખાસ કારણસર બરોબાર ચાલતો ન હોય. કોઇ નિયામક ફેરફાર, મેનેજમેન્ટના રિસ્ટ્રક્ચરિંગ કે કામકાજના વાતાવરણમાં અસ્થાયી ફેરફારના કારણે શેરોનું મિસપ્રાઇસિંગ થઇ શકે છે. એક બીજું યૂનિક ફંડ છે SBI ઇક્વિટી મિનિમમ વેરિઅન્સ ફંડ. આ ફંડ Nifty 50 Indexની ઘણી વિવિધતાવાળી કંપનીઓમાં રોકાણ કરીને એ સુનિશ્ચિત કરે છે કે ફંડના પ્રદર્શનમાં ઉતાર-ચડાવ ઓછામાં ઓછો થાય. HDFC ડિફેન્સ ફંડ એક યૂનિક ફંડ છે જે ડિફેન્સ સેક્ટરની કંપનીઓમાં રોકાણ કરીને લોંગ ટર્મમાં મૂડી વધારવાની કોશિશ કરે છે. બીજી તરફ કોટક પાયોનિયર ફંડ એવી કંપનીઓમાં રોકાણ કરે છે જે ઉત્પાદન, ટેક્નોલોજી, ડિસ્ટ્રીબ્યૂશન વગેરેની લેટેસ્ટ રીતો ઉપયોગમાં લેતી હોય. SBI મેગ્નમ કોમા ફંડના પોર્ટફોલિયોમાં એવી કંપનીઓ સામેલ હોય છે જે કોમોડિટી અને કોમોડિટી બિઝનેસ સાથે જોડાયેલી હોય.
કોઇ થીમેટિક ફંડે પોતાની એસેટનો 80 ટકા હિસ્સો એવા શેરમાં લગાવવાનો હોય છે જે તેની પસંદ કરેલી થીમ સાથે જોડાયેલો હોય. જો કે તે કોઇ થીમ સુધી સીમિત હોય છે પરંતુ જો કોઇ સેક્ટર સ્પેસિફિક ફંડ સાથે તુલના કરવામાં આવે તો તે તેનાથી વધુ ડાયવર્સિફાઇડ હોય છે. લોંગ ટર્મમાં મૂડીમાં સારોએવો વધારો પ્રાપ્ત કરવા માટે ફંડ મેનેજર દરેક પ્રકારના માર્કેટ કેપવાળા શેરોમાં તકો શોધે છે. થીમેટિક ફંડ ઇક્વિટી મ્યુચ્યુઅલ ફંડ્સ કેટેગરીમાં આવે છે. એટલે તેની પર ટેક્સ ઇક્વિટી ફંડ્સની જેમ લાગે છે. જો તમે એક વર્ષની અંદર ફંડના યૂનિટને રીડિમ કરો છો તો તેમાંથી પ્રાપ્ત રિટર્ન પર 15 ટકાના દરે ટેક્સ લાગે છે. એક વર્ષ બાદ તમારે એક નાણાકીય વર્ષમાં થયેલા એક લાખ રૂપિયાથી વધુના કેપિટલ ગેઇન્સ પર 10 ટકાનો લોંગ ટર્મ કેપિટલ ગેઇન આપવો પડશે.
જો રિટર્નની વાત કરીએ તો વેલ્યૂ રિસર્ચના જણાવ્યા અનુસાર 6 ઓક્ટોબર સુધીના ડેટાને જોઇએ તો ઓવરઓલ થીમેટિક મ્યુચ્યુઅલ ફંડ્સે એક વર્ષમાં 18.41%, બે વર્ષમાં 24.94% અને 3 વર્ષમાં 15.93%નું એવરેજ રિટર્ન આપ્યું છે. જો ખાસ ફંડ્સની વાત કરીએ તો એડલવાઇઝ રિસન્ટલી લિસ્ટેડ આઇપીઓ ફંડે એક વર્ષમાં 17.7 ટકા અને 3 વર્ષમાં 24.2 ટકાનું રિટર્ન આપ્યું છે. HDFC હાઉસિંગ ઓપોર્ચ્યુનિટીઝ ફંડે એક વર્ષમાં 28.3 ટકા અને 3 વર્ષમાં 29.5 ટકાનું રિટર્ન આપ્યું છે. હવે સવાલ એ ઉભો થાય છે કે આ પ્રકારના ફંડ્સમાં રોકાણ કરવું જોઇએ?
ઓછા જાણીતા ખાસ થીમેટિક ફંડ્સમાં વધુ જોખમ અને ઉતાર-ચડાવ તો થતા જ હોય છે, જેના કારણે ફાઇનાન્સિયલ એડવાઇઝર આનાથી દૂર રહેવાની સલાહ આપે છે. કારણ કે બજારમાં આ પ્રકારના બીજા ફંડ નથી હોતા એટલે તમે તેના પ્રદર્શનની તુલના જ નથી કરી શકતા. ઘણાં અનુભવી અને ઉંચું જોખમ લેનારા રોકાણકારોને પણ આવા ફંડના પ્રદર્શનનું મૂલ્યાંકન કરવાના સાધન ઘણાં જ ઓછા મળે છે. વિશિષ્ટ કે ખાસ થીમ હોવાના કારણે અનુભવી રોકાણકારો માટે પણ એ અંદાજ લગાવવો મુશ્કેલ હોય છે કે ભવિષ્યમાં તેનું પ્રદર્શન કેવું રહી શકે છે.
લોકપ્રિય થીમેટિક ફંડ્સમાં પણ અનુભવી રોકાણકારોને જ રોકાણ કરવાની સલાહ આપવામાં આવે છે. આવા રોકાણકારોએ પણ આ પ્રકારના ફંડમાં પોતાના પોર્ટફોલિયોનો ફક્ત 10 ટકા હિસ્સો જ રાખવો જોઇએ. આમ છતાં સર્વેશ જેવા રોકાણકારોનું કોઇ ખાસ ફંડ પર દિલ આવી જ ગયું છે તો તેણે કોઇ ફાઇનાસન્યિલ એડવાઇઝરની સલાહ લઇને જ તેમાં રોકાણ કરવું જોઇએ.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો