Money9 Gujarati:
ભારતીય બૉન્ડ્સમાં રેલી જોવા મળી છે. સરકારે આગામી નાણાકીય વર્ષમાં ઉધારીમાં ઘટાડો કરવાની યોજના જાહેર કર્યા બાદ બેન્ચમાર્ક 10-વર્ષીય બોન્ડ યીલ્ડ 0.11 ટકા ઘટીને 7.04 ટકાએ પહોંચી છે. 14 વર્ષની નોટ્સ 0.13 ટકા ઘટી છે. કોર્પોરેટ બોન્ડ યીલ્ડ પણ 0.10થી 0.12 ટકા ઘટી છે. 10-વર્ષીય બૉન્ડ યીલ્ડમાં છેલ્લાં એકાદ વર્ષનો આ સૌથી મોટો ઘટાડો છે.
સરકારને અપેક્ષા છે કે, ભારતીય બૉન્ડ્સ માર્કેટમાં વિદેશી રોકાણ વધશે અને ભારતીય બૉન્ડ્સને ગ્લોબલ ઈન્ડેક્સમાં સામેલ કરવામાં આવશે એટલે તેમાં રોકાણ વધશે, આથી વધારે ઉધારી કરવાની જરૂર નથી. બજેટમાં સરકારે રાજકોષીય ખાધનો અંદાજ ઘટાડીને GDPના 5.1 ટકા રહેવાનો લક્ષ્યાંક મૂક્યો છે. જેના પગલે ઈન્ડિયન સોવરિન બોન્ડમાં તેજીનો દોર જળવાઈ રહેવાનો આશાવાદ છે.
1 એપ્રિલ, 2024થી શરૂ થતા નાણાકીય વર્ષમાં સરકાર 14.13 લાખ કરોડ રૂપિયાની ઉધારી કરવાનો ઈરાદો ધરાવે છે, એમ નાણામંત્રી નિર્મલા સીતારમણે તેમના બજેટ ભાષણમાં જણાવ્યું છે. અગાઉ એવો અંદાજ હતો કે, સરકાર 15.2 લાખ કરોડ રૂપિયાની ઉધારી કરી શકે છે, પરંતુ સરકારે અંદાજ કરતાં ઓછી ઉધારી કરવાની જાહેરાત કરી છે. મુદત પૂરી થયા બાદ ચોખ્ખી ઉધારી 11.75 લાખ કરોડ રૂપિયા રાખવાની યોજના છે. આ જાહેરાતને પગલે, ભારતની બેન્ચમાર્ક 10-વર્ષીય બોન્ડ યીલ્ડમાં તીવ્ર ઘટાડો થયો છે.
સમગ્ર વિશ્વમાં સેન્ટ્રલ બેન્કોનું કડક વલણ હોવા છતાં ઊભરતાં બજારોમાં ભારતીય બોન્ડ માર્કેટનું પ્રદર્શન સારૂ રહ્યું છે. યુએસ ટ્રેઝરી અને અન્ય બોન્ડ્સ જેવી બેન્ચમાર્ક યીલ્ડમાં થયેલા વધારાની સરખામણીએ ભારતીય બોન્ડની યીલ્ડ ચાલુ નાણાકીય વર્ષમાં અત્યાર સુધીમાં ઘટી છે. બોન્ડ માર્કેટમાં આગામી નાણાકીય વર્ષમાં ઘટાડો જળવાઈ રહેવાની સંભાવના છે. સરકારે અપેક્ષા કરતાં નીચો બોરોઈંગ પ્રોગ્રામ (ઉધાર ખર્ચમાં ઘટાડો) જારી કરતાં બોન્ડ માર્કેટમાં તેજી જોવા મળી છે.
Nirmal Bang Securitiesના CEO રાહુલ અરોરાએ Money9 સાથે કરેલી ખાસ વાતચીતમાં જણાવ્યું હતું કે, “સરકારે રાજકોષીય ખાધમાં ઘટાડો કરવાની જે વાત કરી છે, તેનાથી બૉન્ડ માર્કેટને ટેકો મળશે. બોન્ડ યીલ્ડ 7 ટકાની આસપાસ કે તેનાથી પણ નીચે જવાની શક્યતા છે. જો રાજકોષીય ખાધ ઘટીને 5 ટકાની નજીક પહોંચશે તો ઈન્ટરેસ્ટ રેટ કટની શક્યતા પ્રબળ બનશે. રૂપિયો સ્થિર રહેશે. ઈક્વિટી માર્કેટ પર પણ પોઝિટિવ અસર પડશે.”
ICICI Securities Primary Dealershipના ટ્રેડિંગ હેડ નવીન સિંઘે જણાવ્યું હતું કે, “નીચી રાજકોષીય ખાધ ચોક્કસપણે બોન્ડ માર્કેટ માટે સારા સમાચાર છે. ચાલુ વર્ષની સરખામણીએ સરકારે આવતા વર્ષમાં ગ્રોસ બોરોઈંગ ઘટાડવાનો ટાર્ગેટ રાખ્યો છે, જેના કાણે યીલ્ડમાં વધુ ઘટાડાનો માર્ગ મોકળો થયો છે.”
સપ્ટેમ્બરમાં JPMorgan Chase & Coએ ભારતીય બોન્ડને તેના ગ્લોબલ ઈન્ડેક્સમાં સામેલ કરવાની જાહેરાત કરી ત્યારથી વિદેશીઓએ 500 અબજ રૂપિયાથી વધુનું ઈન્ડેક્સ-પાત્ર ડેટમાં રોકાણ કર્યું હતું. તેમ છતાં, વિદેશીઓ ભારતના સોવરિન ડેટ માર્કેટનો માત્ર 2 ટકા હિસ્સો ધરાવે છે, આમ, ભારતના બોન્ડમાં નવા ખરીદદારો માટે પૂરતો અવકાશ છે.
મિરાએ એસેટ કેપિટલ માર્કેટ્સ ઈન્ડિયાના ફિક્સ્ડ-ઈન્કમ ટ્રેડિંગ હેડ અભિષેક બહિનીપતિએ જણાવ્યું હતું કે, ગ્લોબલ બોન્ડ્સ કેવી રીતે વર્તે છે તેને ધ્યાનમાં લીધા વિના આખા વર્ષ માટે નીચી યીલ્ડની સ્થિતિ જોવા માટે સારી સ્થિતિમાં છીએ. 10-વર્ષના બોન્ડ પરની યીલ્ડ જૂન સુધીમાં ઘટીને 6.90-6.95 ટકા થઈ શકે છે.
બોન્ડમાં રોકાણ રોકાણકારના સંજોગો, ધ્યેયો અને જોખમ સહનશીલતા પર આધાર રાખે છે. નીચી યીલ્ડ ધરાવતા બોન્ડ એવા રોકાણકારો માટે વધુ સારા હોઈ શકે છે જેઓ વર્ચ્યુઅલ રીતે જોખમ-મુક્ત સંપત્તિ ઇચ્છતા હોય અથવા જેઓ મિશ્ર પોર્ટફોલિયોનું હેજિંગ કરતા હોય. ઉંચી યીલ્ડમાં જોખમ વધુ હોય છે. બીજી બાજુ જ્યારે બોન્ડની યીલ્ડમાં ઘટાડો થાય છે, ત્યારે તે કોર્પોરેશનો અને સરકાર માટેનો ઉધાર ખર્ચ ઘટાડે છે, આવાસની માંગ વધવાની સંભાવના સાથે મોર્ગેજના દરો પણ ઘટી શકે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો