Money9: અરજી નહોતી કરી છતાં આ બીજું ક્રેડિટ કાર્ડ નિખિલ પાસે પહોંચી ગયું. તેની બેંકમાંથી સતત કોલ આવી રહ્યા હતા કે નિખિલ એક ફ્રી ક્રેડિટ કાર્ડ માટે એલિજિબલ છે. નિખિલે બસ કાર્ડ વિશે થોડી પૂછપરછ કરી અને બેંક એક્ઝિક્યુટિવે તેને નિખિલની સંમતિ માની લીધી. નિખિલને માલામાલ થયાનો અનુભવ થઇ રહ્યો છે. બે-બે ક્રેડિટ કાર્ડ અને દરેક કાર્ડમાં 1 લાખની ક્રેડિટ… પરંતુ શું નિખિલ માટે આ ખુશીની વાત છે કે બે-બે બેંક તેને શોપિંગ માટે 1 લાખ સુધીની ક્રેડિટ આપવા તૈયાર છે…
RBIનો રિપોર્ટ
RBIનો રિપોર્ટ દર્શાવે છે કે ભારતમાં ક્રેડિટ કાર્ડ યુઝર્સની સંખ્યા ઓક્ટોબર 2022 સુધીમાં 7 કરોડ 93 લાખ પર પહોંચી ગઈ છે. દર મહિને લગભગ 2 ટકા નવા ક્રેડિટ કાર્ડ યુઝર્સ ઉમેરાઇ રહ્યા છે. HDFC બેંક અને ICICI બેંકે ઓક્ટોબર 2022માં 2.2 લાખ નવા કાર્ડ ઇશ્યૂ કર્યા. SBIએ 3.4 લાખ કાર્ડ ઇશ્યૂ કર્યા છે. બેંકો ક્રેડિટ કાર્ડ આપવા પર ખાસ ભાર મૂકે છે કારણ કે તેમને આ ધિરાણ પર સારું વ્યાજ મળે છે. પંરતુ આ વ્યાજ ચૂકવો છો તમે.
ક્રેડિટનો અર્થ છે ધિરાણ અને જ્યારે તમે ક્રેડિટ કાર્ડથી ખરીદી કરો છો, ત્યારે બેંક અથવા ક્રેડિટ કાર્ડ કંપની તમને આ નાણાં ઉછીના આપે છે. આ પૈસા તમારા બચત ખાતાના બેલેન્સનો ભાગ નથી, પરંતુ તે તમને લોન તરીકે આપવામાં આવે છે. બેંક કે ક્રેડિટ કાર્ડ કંપની તમારી પાસેથી તરત આ પૈસા પાછા લેતી નથી. ખરીદનારને ખરીદી અને ચૂકવણી વચ્ચે 40 થી 50 દિવસનો સમયગાળો મળે છે. આ સમયગાળામાં બેંક દ્વારા વ્યાજ લેવામાં આવતું નથી. આને શોર્ટ ટર્મ ઈન્ટરેસ્ટ ફ્રી લોન કહી શકાય. પરંતુ આ વ્યાજમુક્ત સમયગાળો ફક્ત શરૂઆતમાં જ મળે છે. એક વાર વ્યાજનું મીટર ચાલુ થઈ જાય પછી અટકવાનું નામ નથી લેતું. બાકી બિલ પર દર મહિને 2.5 થી 3.5 ટકા વ્યાજ વસૂલવામાં આવે છે, જે વાર્ષિક ચક્રવૃદ્ધિ પ્રમાણે 48 ટકા થઈ જાય છે.
જો અચાનક પૈસાની જરૂરિયાત ઉભી થાય, તો તમે ક્રેડિટ કાર્ડ દ્વારા તે જરૂરિયાત પૂરી કરી શકો છો અને જો તમે ગ્રેસ પીરિયડ પૂરો થયા પહેલા પૈસા પરત કરો તો તમારે એક રૂપિયાનું પણ વ્યાજ નહીં ચૂકવવું પડે. પરંતુ વાસ્તવિક સમસ્યા ત્યારે ઊભી થાય છે જ્યારે લોકો ક્રેડિટ કાર્ડના નિયમોને સમજ્યા વિના બેદરકારીથી ખર્ચ કરે છે. ઉદાહરણ તરીકે, જો કાર્ડની મર્યાદા 1 લાખ છે, જેનો તમે સંપૂર્ણ ઉપયોગ કર્યો છે, જ્યારે તેને ચૂકવવાનો સમય આવે છે, તો પછી ન્યૂનતમ રકમ એટલે કે મિનમમ ડ્યૂ ચૂકવીને, તમે નવી ક્રેડિટ લઇ લો છો.
સિબિલ સ્કોર પર અસર
ક્રેડિટ કાર્ડ એક યૂઝરની દેવું ચૂકવવાની ટેવને રેકોર્ડ કરે છે. આ તમારા સિબિલ સ્કોરને બનાવવા કે બગાડવાનું એક મહત્વનું સાધન છે. બેંકો અને નાણાકીય સંસ્થાઓ ક્રેડિટ બ્યુરોને ક્રેડિટ માહિતી મોકલે છે. તમારો ક્રેડિટ સ્કોર નક્કી કરે છે કે તમને ભવિષ્યમાં લોન મળશે કે નહીં, તમે ક્રેડિટ કાર્ડના ઉપયોગથી સંબંધિત આ 3 બાબતોનું ધ્યાન રાખીને સારો ક્રેડિટ સ્કોર બનાવી શકો છો. સૌપ્રથમ, સમયસર બિલની ચૂકવણી કરો અને મિનિમમ ડ્યૂ પેમેન્ટની આદતથી દૂર રહો, આ તમારી પેમેન્ટ હિસ્ટ્રી દર્શાવે છે. બીજું, ક્રેડિટ કાર્ડની લિમિટને સંપૂર્ણપણે સમાપ્ત ન કરો, આને ક્રેડિટ યૂટિલાઇઝેશન કહે છે જે ક્રેડિટ લિમિટમાંથી વપરાયેલી ક્રેડિટ દર્શાવે છે. ક્રેડિટ લિમિટનો ઉપયોગ મર્યાદામાં રહીને કરો. ત્રીજી સૌથી મહત્વની બાબત ખર્ચને અંકુશ રાખો. પ્લાસ્ટિક મની એટલે કે ક્રેડિટ કાર્ડને સ્વાઈપ કરતા પહેલા પોતાની જાતને એવો પ્રશ્ન પૂછો કે શું તમે જે સામાન ખરીદી રહ્યા છો તેની ખરેખર તમને જરૂર છે કે પછી તમે તેને તમારી ઈચ્છા પૂરી કરવા માટે અથવા તો સ્ટેટસ સિમ્બોલના નામે બિનજરૂરી ખરીદી તો નથી કરી રહ્યાં ને..
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો