Money9 Gujarati:
Fake GST Registration Drive: GST ચોરોને પકડવા માટે ટેક્સ સત્તાવાળા ધોમધખતા તાપમાં દોડતા થઈ ગયા છે. અત્યારે સિસ્ટમમાં કુલ 1.39 કરોડ GST નંબરની નોંધણી થયેલી છે, જેમાંથી કેટલા નંબર ખોટા છે તેને શોધવા માટે ટેક્સ અધિકારીઓ મેદાનમાં ઊતર્યા છે. તેમનો ઈરાદો ટેક્સ સિસ્ટમમાંથી ખોટા GST નંબરને દૂર કરવાનો છે. સરકારે આ કવાયત માટે સમગ્ર દેશમાં બે મહિનાની સ્પેશિયલ ડ્રાઈવ શરૂ કરી છે. 16 મેથી શરૂ થયેલી આ ડ્રાઈવ 15મી જુલાઈ સુધી ચાલશે.
ટેક્સ ચોર વધ્યાઃ GST નંબર લેનારા એટલે કે, રજિસ્ટર્ડ ટેક્સપેયર્સની સંખ્યા વધી છે, પણ તેની સાથે સાથે GSTની ચોરીના કિસ્સા પણ વધ્યા છે. નાણાકીય વર્ષ 2020-21માં કુલ 12,596 કેસ પકડાયા હતા, જ્યારે 2022-23માં આવા કેસની સંખ્યા વધીને 14,000ને પાર થઈ ગઈ હતી. હજારો લોકોએ ખોટા GST નંબર લઈને કરોડો રૂપિયાની ઈનપુટ ટેક્સ ક્રેડિટ સરકારી તિજોરીમાં જમા કરાવવાની જગ્યાએ પોતાના ખિસ્સામાં જમા કરાવી છે. આવા લોકોને પકડવા માટે ડ્રાઈવ શરૂ થઈ છે. એટલે કે, તમે GST સર્ટિફિકેટ લેવા માટે જ્યાંનું સરનામું લખાવ્યું હશે ત્યાં ટેક્સ અધિકારી ગમે ત્યારે પહોંચી છે. આ સ્થળે જો અધિકારીને વિગતવાર માહિતી નહીં મળે તો, તમારે 50,000 રૂપિયા સુધીનો દંડ ભરવો પડશે.
સરકારી આંકડાની ભીતરમાંઃ GST હેઠળ નામ નોંધાવનારા લોકોની સંખ્યા 1,39,17,354 છે. 9 નવેમ્બર 2020થી 7 ફેબ્રુઆરી 2023 સુધીના ડેટા અનુસાર, ખોટા નંબર લઈને ફેઈક ઈનવોઈસ બનાવ્યા હોય તેવા 7,628 કેસ નોંધાયા છે, જેમાં 742 લોકોની ધરપકડ કરવામાં આવી છે. બોગસ GST ઈનવોઈસ દ્વારા રૂ.58,950 કરોડની ખોટી ITC (ઈનપુટ ટેક્સ ક્રેડિટ) મળી આવી છે અને રૂ.3,378 કરોડની રિકવરી થઈ છે.
ધરપકડના મામલે ટોચનાં રાજ્યોઃ
2017-18થી લઈને ફેબ્રુઆરી 2023ની વચ્ચે સૌથી વધુ કેસ મહારાષ્ટ્રમાં નોંધાયા છે. સરકારી તિજોરીમાં સૌથી વધુ GST જમા કરાવતા આ રાજ્યમાં રૂ.60,000 કરોડની રકમના બોગસ કેસ નોંધાયા છે, જેમાંથી રૂ.26,066 કરોડની રિકવરી થઈ છે અને સૌથી વધુ 289 લોકોની ધરપકડ થઈ છે. ગુજરાતમાંથી 179 લોકો પકડાયા છે અને રૂ.26,156 કરોડની રકમમાંથી રૂ.8,009 કરોડની રિકવરી થઈ છે.
CA શું કહે છે? આ અંગે ABB એસોસિએટ્સના પાર્ટનર CA ધવલ લિમ્બાણી જણાવે છે કે, “ટેક્સ અધિકારીઓ રેન્ડમલી અને લીડ આધારિત તપાસમાં આગળ વધશે. જે લોકો સાચા છે અને નિયમોનું પાલન કરીને ટેક્સ ભરે છે, તેમણે ગભરાવવાની જરૂર નથી.” તેઓ કહે છે કે, “સિસ્ટમમાં ફેક ઈનવોઈસનું પ્રમાણ વધ્યું છે. એક્ચુઅલ રેન્ડરિંગ ઑફ સર્વિસ કે એન્ટ્રી ફેરવવા માટે ઘણા લોકો ખોટા અને બોગસ બિલ બનાવીને સરકારી તિજોરીને નુકસાન પહોંચાડી રહ્યાં છે અને આવા લોકોને પકડવા માટે સરકારે આ ડ્રાઈવ હાથ ધરી છે.”
બૉર્ડ પર કઈ માહિતી હોવી જોઈએ? GST સર્ટિફિકેટમાં જ્યાંનું સરનામું હોય તેના પ્રવેશદ્વાર પર એક બોર્ડ લાગેલું હોવું જોઈએ. આ બૉર્ડમાં કંપનીનું નામ, GST નંબર, સરનામું, બિઝનેસનો પ્રકાર, પ્રોપ્રાએટરનું નામ લખેલું હોવું જોઈએ.
આ ડૉક્યુમેન્ટ્સ તૈયાર રાખજોઃ ટેક્સ અધિકારી વેરિફિકેશન આવે ત્યારે તમારી પાસે કેટલાક ડૉક્યુમેન્ટ્સની માંગણી કરશે. તમારે નીચે મુજબના ડૉક્યુમેન્ટ્સ હાથવગાં રાખવા જરૂરી છેઃ
– GST સર્ટિફિકેટની નકલ – આધાર કાર્ડ – પાન કાર્ડ – ઈલેક્ટ્રિસિટી બિલ – પ્રોપર્ટી ટેક્સ બિલ – ભાડાં કરાર – કરન્ટ બેન્ક એકાઉન્ટની વિગતો – પર્ચેઝ રજિસ્ટર – સેલ્સ રજિસ્ટર
…તો GST રજિસ્ટ્રેશન કેન્સલ થઈ જશેઃ ધારો કે, ફિઝિકલ વેરિફિકેશન વખતે રજિસ્ટર્ડ ઓફિસ બંધ હશે અથવા કોઈ પ્રતિનિધિની ગેરહાજરીને કારણે અથવા કામ કરતી ટીમ ગેરહાજર હોવાથી સરનામું નહીં મળે તો, ટેક્સ ઓથોરિટી તરફથી GST રજિસ્ટ્રેશન કેન્સલ કરવા માટે નોટિસ ઇશ્યૂ કરવામાં આવી શકે છે. ખાસ તો, સર્વિસ પ્રોવાઈડર્સ અને ફ્રીલાન્સર્સ ઘરેથી કામ કરતા હોય છે અથવા કો-વર્કિંગ સ્પેસ અથવા વર્ક ફ્રોમ હોમનો વિકલ્પ પસંદ કરીને કામ કરે છે, તેમણે આવી નોટિસોથી બચવા માટે સાવચેત રહેવું પડશે.
નિયમ શું કહે છે? CGST રૂલ્સ, 2017ના રૂલ 18 પ્રમાણે, પ્રત્યેક રજિસ્ટર્ડ વ્યક્તિએ તેમના બિઝનેસના પ્રિન્સિપાલ પ્લેસ અને કામ કરવાના તમામ વધારાના સ્થળ પર વિગતવાર માહિતી દર્શાવતું બોર્ડ મૂકવું જરૂરી છે. સેક્શન 35 અનુસાર, બિઝનેસના રજિસ્ટર્ડ સ્થળ પર એકાઉન્ટ્સ અને રેકોર્ડ્સ જાળવવા ફરજિયાત છે. આ ડૉક્યુમેન્ટ્સ નિયમાનુસાર ફોર્મેટમાં હોવા જોઈએ.
કેટલો દંડ થશે? જો તમે કોઈ નિમયનું પાલન નહીં કર્યું હોય તો, CGST એક્ટ, 2017ના સેક્શન 125 હેઠળ રૂ. 50,000 સુધીનો દંડ ભરવો પડી શકે છે. આ સિવાય, તમારું GST રજિસ્ટ્રેશન કેન્સલ થઈ શકે છે તેમજ રૂલ 86A હેઠળ ઈનપુટ ટેક્સ ક્રેડિટ પણ બ્લોક થઈ શકે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો