Money9 Gujarati: ટેક્સ ભરવો કોઈને ગમતો નથી. ટેક્સ બચાવવા માટે લોકો ઈનકમ ટેક્સની એક પણ કલમનો ઉપયોગ કરવાનું ચૂકતા નથી. પગારદાર લોકો સેક્શન 80C, સેક્શન 80D અને સેક્શન 24 હેઠળ મળતાં કરલાભ નીચોવી નાખે છે. ટેક્સ બચાવવાની આ પરંપરાગત જોગવાઈઓ છે. જોકે, કેટલાક ઓછા જાણીતા વિકલ્પો પણ તમને ટેક્સ બચાવવામાં મદદરૂપ થઈ શકે છે. આ વિકલ્પો કાયદાકીય રીતે પણ માન્ય છે, એટલે તમે ડર્યા વગર તેનો ઉપયોગ કરીને સારો એવો ટેક્સ બચાવી (Tax Saving Tips) શકો છો.
નોન-વર્કિંગ જીવનસાથીના નામે રોકાણ કરો સામાન્ય રીતે, નોન-વર્કિંગ જીવનસાથીના નામે કરેલું રોકાણ તમારી આવકમાં જોડવામાં આવે છે અને તેના પર ટેક્સ લાગે છે. પણ તમે નીચે જણાવેલી ટ્રિક અપનાવીને આ ટેક્સમાંથી બચી શકો છો.
એવા વિકલ્પ પસંદ કરો જેમાં વ્યાજ પર ટેક્સ ના લાગતો હોય. જેમકે, પબ્લિક પ્રૉવિડન્ટ ફંડ (PPF). તમે PPFમાં વર્ષે 1.5 લાખ રૂપિયાનું રોકાણ કરી શકો છો. આ રોકાણ તમારા જીવનસાથીના નામે કરો. PPFમાં થતી વ્યાજની આવક પર ટેક્સ લાગતો નથી, એટલે તમારી આવકમાં તેનો ઉમેરો નહીં થાય અને ક્લબિંગ ઓફ ઈનકમ પણ લાગું નહીં પડે.
બીજો એક રસ્તો છે – ઈનડાયરેક્ટ ટ્રાન્સફરનો. એટલે કે, તમે જીવનસાથીના ખાતામાં ડાયરેક્ટ પૈસા ટ્રાન્સફર કરવા કરતાં વાયા-વાયા ટ્રાન્સફર કરીને ટેક્સમાંથી બચી શકો છો. ધારો કે, તમે 5 લાખ રૂપિયા તમારી પત્નીના ખાતામાં ટ્રાન્સફર કરવા માંગો છો. જો તમે ડાયરેક્ટ આ પૈસા ટ્રાન્સફર કરશો તો આ રકમમાંથી જે કમાણી થશે તેને પતિની આવકમાં ક્લબ કરવામાં આવશે અને સ્લેબ પ્રમાણે ટેક્સ લાગુ થશે. આથી, ડાયરેક્ટ ટ્રાન્સફર કરવાની જગ્યાએ તમે તમારા સસરાનાં ખાતામાં 5 લાખ રૂપિયા ટ્રાન્સફર કરી શકો છો. ત્યારબાદ તમારા સસતા આ પૈસા તેમની દીકરી એટલે કે તમારી પત્નીના ખાતામાં ટ્રાન્સફર કરશે. આ બંને કેસમાં ટ્રાન્સફરની રકમને ગિફ્ટ ગણવામાં આવશે અને ટેક્સની જવાબદારી રિસિવરીની રહેશે. એટલે આ કેસમાં પણ ક્લબિંગ ઓફ ઈનકમ નહીં થાય.
મેજર બાળકના નામે રોકાણ કરો Minor એટલે કે સગીર બાળકના નામે રોકાણ કરો અને તેમાં જે વ્યાજ મળે તેને માતા-પિતાની આવકમાં ક્લબ કરવામાં આવે છે. આમાં કોઈ ટેક્સ બેનિફિટ થતો નથી. પરંતુ જ્યારે બાળક Major એટલે કે, પુખ્ત વયનું થશે ત્યારે આ ટ્રિકથી ફાયદો થશે. ઉદાહરણ સાથે સમજીએ. ધારો કે, દર વર્ષે 5 લાખ ફીના અંદાજ સાથે તમે બાળકના શિક્ષણ માટે 20 લાખ રૂપિયા ભેગા કર્યાં છે. જો આ પૈસા પોતાના નામે FD કરાવીને મૂકશો તો વ્યાજની કમાણી પર તમારા ટેક્સ સ્લેબ અનુસાર ટેક્સ લાગશે. પરંતુ આ FD પોતાના બાળકના નામે કરાવશો તો ટેક્સમાંથી બચી શકશો. તમે બાળકના લગ્ન માટે પણ આવી જ ટ્રિક અપનાવીને ટેક્સમાંથી બચી શકો છો.
માઈનર બાળકના નામે રોકાણ કરો સગીર (Minor) બાળકના નામે કરેલા રોકાણ પર જે કમાણી થાય છે તેને માતા-પિતાની આવકમાં ઉમેરવામાં આવે છે. પરંતુ તેનાથી બચવાનો પણ એક રસ્તો છે ધારો કે, તમે આવતા પાંચ વર્ષમાં તમારા બાળકના ઉચ્ચ અભ્યાસ માટે 10 લાખ ભેગા કરવા માંગો છો, તો તમારે દર મહિને 15,000 રૂપિયાનું રોકાણ કરવું પડશે. આ ટાર્ગેટ પાર પાડવામાં ડેટ મ્યુચ્યુઅલ ફંડ્સ (Debt mutual funds) અસરકારક નીવડશે, કારણ કે જ્યાં સુધી તમે પૈસા નહીં ઉપાડો ત્યાં સુધી ટેક્સ નહીં લાગે. તમારા બાળકના નામે ડેટ ફંડ્સમાં રોકાણ શરૂ કરી દો અને જ્યારે બાળક પુખ્ત વયનું થઈ જાય ત્યારે ઉચ્ચ અભ્યાસ માટે આ પૈસા ઉપાડી લો. રોકાણ બાળકના નામે હોવાથી ટેક્સની જવાબદારી પણ તેની ગણાશે કારણ કે તે હવે સગીરમાંથી પુખ્ત વયનું થઈ ગયું હશે. આમ, તમારી આવકમાં ઉમેરો નહીં થાય અને તમે ટેક્સ પણ બચાવી શકશો.
માતા-પિતાના નામે રોકાણ કરો બેન્ક FDમાં રોકાણ ભારતમાં લોકપ્રિય ડેટ ઈન્વેસ્ટમેન્ટ વિકલ્પ છે, પરંતુ તેમાં ટેક્સ બચતો નથી. પરંતુ જો માતા-પિતાના નામે FD કરાવશો તો ટેક્સ બચાવી શકશો ઉદાહરણ સાથે સમજીએ. ધારો કે, તમે 30 ટકા ટેક્સ સ્લેબમાં આવો છો અને 10 લાખની FD કરાવો છો. માની લો કે, બેન્ક 7 ટકા ઈન્ટરેસ્ટ રેટ આપી રહી છે તો વર્ષે વ્યાજ પેટે 70,000ની કમાણી થશે. તેના પર 30 ટકા લેખે 21,000 ટેક્સ ભરવાનો આવશે. પરંતુ જો તમે 10 લાખ તમારા પિતાના ખાતામાં ટ્રાન્સફર કરશો તો તેને ગિફ્ટ માનવામાં આવશે અને લોહીનો સંબંધ હોવાથી ટેક્સ નહીં લાગે. તમારા પિતા સીનિયર સીટિઝન હોવાથી તેમને FDમાં 8 ટકા વ્યાજ મળશે, એટલે 10 લાખની FD પર તેમને 80,000ની કમાણી થશે. એટલે તમારા કરતાં 10,000 વધારે વ્યાજ પણ મળશે અને 21,000નો ટેક્સ બચશે. આમ 31,000નો ફાયદો થશે.
સંબંધિત ખબર: ITR ફાઈલ કરશો, તો ફાયદામાં રહેશો
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો