Money9 Gujarati:
સ્ટીલ ટ્યુબ અને પાઇપ બનાવતી કંપની વિભોર સ્ટીલ ટ્યુબ્સ લિ. (VSTL)એ IPO લાવવા માટે ડ્રાફ્ટ પેપર્સ જમા કરાવ્યા છે. કંપનીએ મૂડીબજારના નિયમનકાર સેબી સમક્ષ ડ્રાફ્ટ રેડ હેરિંગ પ્રોસ્પેક્ટસ (DRHP) જમા કરાવ્યા હોવાની જાહેરાત કરી છે. કંપનીની ઑફરમાં 66.47 કરોડ રૂપિયા સુધીના ફ્રેશ ઈક્વિટી શેર્સ (10 રૂપિયાની ફેસ વેલ્યુ) ઈશ્યૂ કરવામાં આવશે. કંપની OFS (ઑફર ફોર સેલ) દ્વારા એક પણ શેર વેચવાની નથી. કંપનીના શેર BSE અને NSE પર લિસ્ટ થશે.
લીડ મેનેજર અને રજિસ્ટ્રાર
વિભોર સ્ટીલના IPOની લીડ મેનેજર ખંભાતા સિક્યૉરિટીઝ છે જ્યારે રજિસ્ટ્રારની જવાબદારી કેફિન ટેકનોલોજિસને સોંપવામાં આવી છે.
IPO લાવવાનો ઈરાદો
કંપનીએ જણાવ્યું છે કે, IPO દ્વારા જે ફંડ મળશે તેનો ઉપયોગ કાર્યકારી મૂડીની જરૂરિયાતને પૂરી કરવા માટે થશે.
બિઝનેસ
VSTL ઇલેક્ટ્રિક રેઝિસ્ટન્ટ વેલ્ડેડ પાઇપ્સ, હોટ-ડિપ્ડ ગેલ્વેનાઇઝ્ડ પાઇપ્સ, હોલો સેક્શન પાઇપ, પ્રાઈમર પેઇન્ટેડ પાઇપ, SS પાઇપ અને ક્રેશ બેરિયર્સ જેવી સ્ટીલ પ્રોડક્ટ્સનું ઉત્પાદન કરે છે. કંપની મહારાષ્ટ્ર, તેલંગાણા અને હરિયાણા સ્થિત પ્લાન્ટમાં ઉત્પાદન કરે છે, આ પ્લાન્ટ્સની કુલ ક્ષમતા 2,23,160 mtpa છે. કંપની તેની પ્રોડક્ટ્સનો સપ્લાય મહારાષ્ટ્ર, ગુજરાત, મધ્ય પ્રદેશ, તેલંગાણા, કર્ણાટક અને તમિળ નાડુ સહિતના પશ્ચિમ અને દક્ષિણના માર્કેટ્સમાં કરે છે.
કંપનીના ચેરમેન અને એક્ઝિક્યુટિવ ડાયરેક્ટર વિજય કૌશિક જણાવે છે કે, વર્ષોથી ઉચ્ચ ગુણવત્તાયુક્ત સ્ટીલ પ્રોડક્ટ્સના ઉત્પાદન અને સપ્લાય માટેના અમારા સતત પ્રયાસોથી સમગ્ર ભારતમાં અમારા ક્લાયન્ટ્સ સંતુષ્ટ છે. અમે અમારી પ્રોડક્ટ્સ માટે નવી તકો અને ભુગોળમાં પ્રવેશવા તથા અમારી સપ્લાય ચેઇનને મજબૂત કરવાનો પ્રયાસ કરી રહ્યાં છીએ ત્યારે અમે IPO દ્વારા ભંડોળ એકત્રિત કરી રહ્યાં છીએ. અસ્થિર નીતિ પ્રણાલીઓ ધરાવતા ઉદ્યોગમાં અમે સફળતાપૂર્વક પ્રોડક્ટ લાઇન તૈયાર કરી છે તથા છેલ્લાં કેટલાંક સમયથી ઘરેલુ ઉત્પાદનનો મજબૂત હિસ્સો રહ્યાં છીએ.
કંપનીએ ઓરિસ્સામાં 1,20,000 mtpaની ક્ષમતાના ઉત્પાદન એકમની સ્થાપના દ્વારા તેની કામગીરીમાં વિસ્તરણ માટેની વ્યવસાયિક યોજના તૈયાર કરી છે તથા તેલંગાણામાં તેના વર્તમાન ક્ષમતા 96,000 mtpaથી વધારીને 1,52,000 mtpa કરાશે.
જિન્દાલ સાથે કરાર
વિભોર સ્ટીલે એપ્રિલ 2023માં જિન્દાલ પાઇપ્સ સાથે કરાર કર્યાં હતાં. આ કરાર અંતર્ગત જિન્દાલ પાઇપ્સને 1,00,000 mtpaના મૂલ્યના ફિનિશ્ડ ગુડ્સનું ઉત્પાદન અને સપ્લાય કરે છે, જેનું વેચાણ જિન્દાલ સ્ટાર બ્રાન્ડ હેઠળ કરવામાં આવે છે.
ફાયનાન્સિયલ સ્થિતિ
નાણાકીય વર્ષ 2023માં કંપનીની કુલ આવક 1,112.11 કરોડ રૂપિયા હતી, જે નાણાકીય વર્ષ 2022માં 817.99 કરોડ રૂપિયા હતી. નાણાકીય વર્ષ 2023માં EBITDA 46.84 કરોડ રૂપિયા હતી, જે નાણાકીય વર્ષ 2022માં 30.18 કરોડ રૂપિયા હતી. નાણાકીય વર્ષ 2023માં કંપનીનો PAT 21.06 કરોડ રૂપિયા હતો, જે નાણાકીય વર્ષ 2022માં 11.33 કરોડ રૂપિયા હતો.
પોપ્યુલર વ્હીકલ્સ પણ લાવશે IPO
ઓટોમોબાઈલ ડીલર પોપ્યુલર વ્હીકલ્સ એન્ડ સર્વિસીસે પણ IPO લાવવા માટે ડ્રાફ્ટ પેપર્સ જમા કરાવી દીધા છે. કંપનીએ મૂડીબજારના નિયમનકાર સેબી સમક્ષ ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કર્યાં છે. કંપની 250 કરોડ રૂપિયા સુધીના ઇક્વિટી શેર્સ (મૂળ કિંમત 2 રૂપિયા)ના ફ્રેશ ઇશ્યૂ અને 14,275,401 ઇક્વિટી શેર્સ સુધીના ઓફર ફોર સેલ (OFS) દ્વારા ફંડ એકત્ર કરવાની યોજના ધરાવે છે. OFSમાં બન્યનટ્રી ગ્રોથ કેપિટલ II LLC દ્વારા 14,275,401 સુધીના ઇક્વિટી શેર્સ વેચવામાં આવશે.
IPO લાવવાનો ઈરાદો
ફ્રેશ ઇશ્યૂમાંથી મળેલા ફંડનો ઉપયોગ દેવું ચૂકવવા માટે કરવાનો કંપનીનો ઈરાદો છે. પોપ્યુલર વ્હીકલ્સે અને તેની પેટાકંપનીઓએ 192 કરોડ રૂપિયાનું ધિરાણ લીધેલું છે, જેની આંશિક અથવા સંપૂર્ણ ચૂકવણી કરવાની યોજના છે. કંપની IPO દ્વારા મળનારી રકમનો ઉપયોગ અન્ય સામાન્ય કૉર્પોરેટ હેતુ માટે કરવા માંગે છે. કંપનીના શેર્સનું લિસ્ટિંગ BSE અને NSE પર થશે. IPOના લીડ મેનેજર્સમાં ICICI સિક્યુરિટીઝ, નુવામા વેલ્થ મેનેજમેન્ટ અને સેન્ટ્રમ કેપિટલ ઇશ્યૂનો સમાવેશ થાય છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો