MONEY9 GUJARATI : જો તમે વીમો લીધો છે અને તેની જાણ તમારા પરિવારના કોઈ સભ્યને નથી તો સૌથી પહેલા આ મહિતી પરિવાર સાથે શેર કરી લો. કારણ કે ક્યાંક તમારી ગેરહાજરીમાં મેચ્યોર થયેલી વીમાની રકમ પર ઠગબાજો હાથ સાફ કરી શકે છે. જેના સુરક્ષિત ભવિષ્ય માટે તમે આ રોકાણ કર્યું હતું તે તમારો પરિવાર જ વંચિત રહી જાય તેવું બની શકે છે.
દિલ્લી પોલીસે થોડા દિવસો પહેલા જ સાયબર ઠગબાજોની એક ટોળકી પકડી પાડી છે. જે નકલી દસ્તાવેજોના આધારે લોકોના વીમાના પૈસા ઉપાડી લેતી હતી. ટોળકીએ 22 પૉલિસીધારકોને 2 કરોડ 38 લાખ રૂપિયાનો ચૂનો લગાવ્યો હતો. મૃતક વ્યક્તિઓની પૉલિસીના રુપિયા ઉપાડી લીધા હતા. ચોંકાવનારી વાત તો એ છે કે આ આખો ખેલ વીમા કંપની મેક્સ લાઈફ ઈન્સ્યોરન્સના ભૂતપૂર્વ અને વર્તમાન કર્મચારીઓની મિલીભગતથી ચાલતો હતો.
વીમાના પૈસા પચાવી પાડવા માટે સૌથી પહેલા એવા વીમાધારકોને શોધવામાં આવ્યા જેમના મેચ્યોરિટીના પૈસા વીમા કંપની પાસે ક્લેમ કર્યા વગરના પડ્યા હતા. એટલે કે પૉલિસી મેચ્યોર થઈ ગઈ હતી પરંતુ પૈસા લેવા કોઈ આવ્યું નહોતું. વીમા કંપનીના એક ભૂતપૂર્વ વરિષ્ઠ અધિકારીની પહોંચ આ ડેટા સુધી હતી. જેમણે ષડયંત્રને અંજામ આપ્યો. આ માટે ઝૂંપડપટ્ટીમાં રહેતા ગરીબ લોકોને પકડવામાં આવ્યા. જેમને પૈસા આપી તેમના આધાર પર અસલી વીમાધારકનું નામ અને સરનામું ચડાવી દેવામાં આવ્યું. બેંકમાં નકલી ડૉક્યુમેન્ટના આધારે ખાતા ખોલવામાં આવ્યા. ત્યારબાદ વીમા કંપનીમાં રિફંડ માટે ક્લેમ કરી ખાતામાં પૈસા મેળવી લેવાયા.
આ માત્ર એક ઘટના નથી, વીમા સાથે જોડાયેલા ચીટિંગના રોજ ઘણા બનાવો સામે આવી રહ્યા છે. ઈન્ડિયા ફૉરેન્સિક રિસર્ચના જણાવ્યા પ્રમાણે ઠગાઈના કારણે ભારતમાં વીમા ક્ષેત્રને દર વર્ષે લગભગ 30 હજાર કરોડ રુપિયાનું નુકસાન થાય છે. જનરલ ઈન્સ્યોરન્સની સરખામણીએ જીવન વીમા એટલે કે લાઈફ ઈન્સ્યોરન્સમાં ઠગાઈની ઘટનાઓ વધુ નોંધાય છે. 86 ટકા ફ્રોડની ઘટનાઓ જીવન વીમામાં નોંધાઈ છે જ્યારે 14 ટકા કેસ જનરલ ઈન્સ્યોરન્સ એટલે કે કાર-બાઈક, હેલ્થ જેવા વીમા સાથે જોડાયેલા છે.
ક્યારેક વીમો ખરીદવાના નામ પર તો ક્યારેક વીમાની રકમ ઉપાડવાના નામ પર લોકો પાસેથી પૈસા પડાવવામાં આવે છે. ઘણીવાર પૉલિસીધારક પણ હોય છે કૌભાંડમાં ભાગીદાર. જેમ કે ફેક ક્લેમ ફ્રોડ, જેમાં એજન્ટ સાથે મળી ખોટો અથવા તો વધુ પડતો દાવો કરવો, મેડિકલ રેકોર્ડમાં ચેડા કરવા. આ સાંઠગાંઠમાં હૉસ્પિટલ પણ જોડાયેલી હોય છે. જેને સર્વિસ પ્રોવાઈડર ફ્રોડ કહેવામાં આવે છે. જેમાં હૉસ્પિટલ નકલી બિલ બનાવે છે. નાની બિમારીની સારવાર માટે મોટું બિલ બનાવી દેવાય છે.
ત્રીજું હોય છે એપ્લીકેશન ફ્રોડ જેમાં વીમાધારક વીમાના પ્રપોઝલ ફોર્મમાં ક્યારેક જાણતા તો ક્યારેક અજાણતા ઉંમર, વ્યવસાય, હેલ્થ અને કેટલીક અંગત બાબતો સાથે જોડાયેલી વિગતો ખોટી આપે છે જેથી ઓછું પ્રિમિયમ આપવું પડે. હાલના સમયમાં આઈડેન્ટિટી થેફ્ટ ફ્રોડ એટલે કે ઓળખ ચોરી કરીને છેતરપિંડીની ઘટનાઓ સામે આવી રહી છે. જેમાં ઠગ વીમા કંપની પાસેથી વીમાના પૈસા મેળવવા માટે કોઈ બીજી વ્યક્તિ એટલે કે અસલી વીમાધારકની ઓળખનો ઉપયોગ કરે છે. જેવું મેક્સ લાઈફ ઈન્સ્યોરન્સ વાળી ઘટનામાં મોહન સાથે થયું.
વીમાધારકના ડેટાના આધારે નકલી ડૉક્યુમેન્ટ બનાવાયા અને વીમાના પૈસા ઉપાડી લેવાયા. વીમાધારકની ડિટેલ મેળવી આ ઠગાઈ આચરવામાં આવી છે. ફ્રોડ પૉલિસીધારક તરફથી હોય કે કોઈ એજન્ટ કે પછી ઠગ તરફથી,, બંને પર કાર્યવાહી થઈ શકે છે.
વીમા સાથે જોડાયેલી ચિટીંગની ફરિયાદ સૌથી પહેલા તમે વીમા કંપનીને કરો. કંપની પાસેથી જો 15 દિવસમાં જવાબ નથી મળતો તો કંપનીના ગ્રીવાંસ સેલમાં ફરિયાદ કરો. વીમા નિયામક Insurance Regulatory and Development Authority of india ની વેબસાઈટ પર દરેક કંપનીના ગ્રીવાંસ રિડ્રેસલ સિસ્ટમનું ઓનલાઈન પેજ અને ટૉલ નંબર તમને મળી જશે. જો અહીં પણ સંતોષકારક જવાબ નથી મળતો તો IRDAમાં ફરિયાદ કરો. policyholder.gov.in અથવા વીમા ભરોસા પોર્ટલ પર ફરિયાદ નોંધાવી શકાય છે. આઈડેન્ટિટી થેફ્ટ જેવી સાયબર ઠગાઈ થાય તો ફોન નંબર 1930 અને 155260 પર કૉલ કરીને ફરિયાદ દાખલ કરાવી શકો છો. સાથે જ www.cybercrime.gov.in અને સ્થાનિક પોલીસ સ્ટેશનમાં ફરિયાદ ખાસ દાખલ કરાવો એટલે કે રેકોર્ડમાં મુકી દો.
છેતરપિંડીની આવી ઘટનાઓથી ના માત્ર વીમા કંપની પરંતુ નિર્દોષ પૉલિસી ધારકોને પણ નુકસાન થાય છે. તો ધ્યાન રાખો કે ઘરના તમામ સભ્યો પાસે જે પણ વીમા લેવાયેલા છે તેની મેચ્યોરિટીની તારીખનું લીસ્ટ બનાવીને રાખવું. ખાસ કરીને ઈન્વેસ્ટમેન્ટ કમ ઈન્સ્યોરન્સ વાળા પ્લાનમાં મેચ્યોરિટીના પૈસા કંપની પાસે ક્લેમ વગર ના રાખવા. વીમો રિન્યુઅલના નામે કોઈ પણ પ્રકારનું કેશ પેમેન્ટ ક્યારેય ના કરો અને પેમેન્ટ એપ અથવા તો ચેક દ્વારા માત્ર કંપનીના નામે જ કરો. આ રીતે પેમેન્ટ માટે ક્યારેય OTP શેર ના કર્યો. સાથે જ ઠગાઈથી બચવા જાગતા રહો અને હા મની9 જોતા રહો…
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો