મનન છેલ્લી તારીખે હેલ્થ ઈન્સ્યૉરન્સનું પ્રીમિયમ ભરવાનું ભૂલી ગયો અને તેની પૉલિસી લેપ્સ થઈ ગઈ. રિન્યુઅલ ડેટ જતી રહી છે અને ગ્રેસ પીરિયડ પણ સમાપ્ત થઈ ગયો છે. હેલ્થ વીમા કંપની ગ્રાહકને પ્રીમિયમ ભરવાની છેલ્લી તારીખ પછી પણ 15થી 30 દિવસનો ગ્રેસ પીરિયડ આપે છે. પરંતુ મનને આ ગ્રેસ પીરિયડમાં પણ પ્રીમિયમ ના ભર્યું. એવું નહોતું કે મનન પાસે પૈસા નહોતા. પણ છેલ્લાં બેથી ત્રણ વર્ષમાં સારવારની જરૂર નહોતી પડી એટલે પ્રીમિયમ પણ ના ભર્યું અને હવે પૉલિસી જ બંધ થઈ ગઈ.
મનને બહુ મોટી ભૂલ કરી છે. જેમ-જેમ ઉંમર વધે છે તેમ-તેમ હેલ્થ વીમાની જરૂરિયાત પણ વધે છે. જો તમે સમયસર તમારી હેલ્થ પૉલિસી રિન્યુ કરાવી લો તો, વધારે ઉંમર થવા છતાં અને બીમારીઓ હોવા છતાં તમને આરોગ્ય કવચ મળતું રહે છે. જેમ-જેમ તમારી પૉલિસી જૂની થતી જશે તેમ-તેમજ તમારી જૂની બીમારીઓનો વેઈટિંગ પીરિયડ પણ સમાપ્ત થતો જશે. જો તમને કોઈ બીમારી અગાઉથી હશે તો તેનું કવર પણ મળવા લાગશે. પરંતુ જો તમે પૉલિસી બ્રેક કરાવી લેશો તો તમારે ફરીથી વેઈટિંગ પીરિયડના ચક્કરમાં પડવું પડશે.
ધારો કે, તમને પહેલેથી જ કોઈ બીમારી હોય તો તેનું કવર મેળવવા માટે બે વર્ષથી ચાર વર્ષ સુધીનો વેઈટિંગ પીરિયડ ચાલે છે. જો તમારી પૉલિસી લેપ્સ થઈ જશે તો નવેસરથી લીધેલી પૉલિસીમાં બીમારીઓનું કવર મેળવવા માટે વધારે વર્ષો સુધી રાહ જોવી પડશે.
એટલું જ નહીં, તમે કોઈ વર્ષે ક્લેમ ના કરો તો, વીમા કંપની તમને નો-ક્લેમ બોનસ પણ આપે છે. આ બોનસ વાર્ષિક 5થી 50 ટકા સુધીનું હોઈ શકે છે. આ બોનસને કારણે તમને મૂળ વીમા કવચ એટલે કે સમ ઈન્સ્યૉર્ડ 100 ટકા સુધી વધારવાની તક મળે છે. તમે 5 લાખનું કવર લીધું હોય તો નો-ક્લેમ બોનસના સહારે ધીમે-ધીમે 10 લાખનું થઈ શકે છે. પરંતુ જો તમે પૉલિસી સમયસર રિન્યુ નહીં કરાવો અને તમારી પૉલિસી લેપ્સ થઈ જશે તો આ બોનસનો લાભ પણ નહીં મળે.
ઉંમર વધે તેમ બીમાર થવાની શક્યતા પણ વધતી જાય છે. એટલે જો તમે સમયસર પૉલિસી રિન્યુ નહીં કરાવો તો, નવી પૉલિસી ખરીદતી વખતે તમારે વધારે પ્રીમિયમ ભરવાનો વારો આવશે.
અમુક ઉંમર થઈ જાય એટલે વીમા કંપની તમારી મેડિકલ તપાસ કરાવ્યા પછી જ વીમા કવચ આપે છે. વધારે પડતી ઉંમર હોય, મેડિકલ હિસ્ટ્રી ખરાબ હોય અને લાઈફસ્ટાઈલ સંબંધિત આદતો હોય તો વીમા કંપની કવર દેવાની ના પણ પાડી શકે છે.
જો તમારી પાસે હેલ્થ પૉલિસી હોય તો મેડિકલ ખર્ચામાં રાહત મળવાની સાથે ઈનકમ ટેક્સ સેવિંગમાં પણ મદદ મળે છે. આવકવેરા કાયદાની કલમ 80ડી હેઠળ એક નાણાકીય વર્ષમાં 25 હજાર રૂપિયા સુધીનું પ્રીમિયમ ભરીને કરલાભ માંગી શકો છો.
ધારો કે, માતા-પિતા સીનિયર સીટિઝન હોય તો તેમના હેલ્થ પ્લાન પર 50 હજાર રૂપિયા સુધીના પ્રીમિયમને ટેક્સ-ફ્રી ગણાવી શકો છો. આથી હેલ્થ પ્લાન આરોગ્ય અને ટેક્સ એમ બંને રીતે મહત્ત્વનો છે. પરંતુ જો પ્લાન લેપ્સ થઈ જશે તો આ બંને લાભ ગુમાવવા પડશે.
યાદ રાખજો, હેલ્થ પ્લાન ખરીદવાનો ઈરાદો ટેક્સ બચાવવાનો નહીં, પરંતુ સારવાર સંબંધિત ખર્ચાને પહોંચી વળવાનો હોવો જોઈએ. તમારા ફાયનાન્શિયલ પ્લાનિંગમાં હેલ્થ ઈન્સ્યૉરન્સ એક મહત્ત્વનો ભાગ હોવો જોઈએ.
પર્સનલ ફાઈનાન્સ એક્સપર્ટ બલવંત જૈન કહે છે કે, જો તમારી પાસે જૂની હેલ્થ પૉલિસી હોય તો, હંમેશા સમય અગાઉ રિન્યુ કરાવી લો. વીમા કંપની છેલ્લી તારીખના એક મહિના પહેલાથી જ રિમાઈન્ડર મોકલવાનું શરૂ કરી દે છે. તમારે પણ પોતાની જાતે એક રિમાઈન્ડર સેટ કરી લેવું જોઈએ.
હેલ્થ વીમાનું પ્રીમિયમ ભરવા માટે ક્યારેય પણ છેલ્લી તારીખ સુધી રાહ ના જુઓ. તમારે એક મહિના વહેલું પ્રીમિયમ ભરી દેવું જોઈએ.
પોતાના પરિવારની જરૂરિયાતને ધ્યાનમાં રાખીને કવરમાં વધારો કરી શકો છો.
જો કોઈ કારણસર પ્રીમિયમ ભરવાનું ચૂકી જવાય તો, તમારા આરોગ્યની સલામતી જોખમમાં મૂકાઈ જશે.
એટલે અમારી સલાહ છે કે, તમે પણ મનન જેવી ભૂલ ક્યારેય ના કરતા.
પોતાની હેલ્થ પૉલિસીનું પ્રીમિયમ હંમેશા સમય કરતાં વહેલા ભરવાની આદત રાખજો.
જો તારીખ જતી રહેશે તો પૉલિસી લેપ્સ થઈ જશે. પૉલિસી નહીં હોય અને ત્યારે જ પરિવારના કોઈ સભ્યને હેલ્થનો ઈશ્યૂ થયો તો તમારું પૈસાનું ગણિત ખોરવાઈ જશે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો