Money9 Gujarati:
હોસ્પિટલના ખર્ચા તમારી ઊંઘ ઉડાડી શકે છે. પરિવારનો એક પણ સભ્ય બીમાર થઈ જાય તો આખા પરિવારે ઉજાગરા કરવા પડે છે. એટલું જ નહીં, બીમાર વ્યક્તિની સારવારનો ખર્ચ વધારે પડતો હોય તો ઘરના તમામ લોકોનો પનો ટૂંકો પડે છે. ખર્ચ સામે આવક તથા બચત પણ ટૂંકી પડે તો મુશ્કેલી વધી શકે છે. આવી સ્થિતિમાં આરોગ્ય વીમો કામમાં આવે છે. કોવિડ પછી તો કેટલીક વીમા કંપનીઓ હોસ્પિટલાઈઝેશન કવરની સાથે સાથે OPD ખર્ચનું પણ કવર આપી રહી છે.
OPD કવર vs IPD કવર
ડાયાબિટીસ કે બ્લડ પ્રેશર જેવી ઘણી બીમારીની સારવાર માટે હોસ્પિટલમાં દાખલ થવાની જરૂર નથી. હોસ્પિટલ કે ક્લીનિકમાં ડૉક્ટરને મળીને, ટેસ્ટ કરાવીને અને દવા લઈને ઉપચાર થઈ શકે છે. આવા ખર્ચા આઉટપેશન્ટ ડિપાર્ટમેન્ટ એટલે કે, OPD કવરમાં સામેલ થાય છે. આ ખર્ચા આમ તો મામૂલી લાગે, પરંતુ દર મહિને કે પખવાડિયે OPD ખર્ચ થતો હોય તો ઘણા પૈસા વપરાઈ જાય છે. નીતિ આયોગના રિપોર્ટ અનુસાર, હેલ્થકેર પાછળ થતા કુલ ખર્ચનો 63 ટકા ખર્ચ ખિસ્સામાંથી કાઢવો પડે છે. એટલે કે એવો ખર્ચ જે ઈન્સ્યૉરન્સ પૉલિસીમાં કવર થતો નથી. હોસ્પિટલાઈઝેશન વખતે થતો ખર્ચ ઈન-પેશન્ટ ડિપાર્ટમેન્ટ એટલે કે, IPD કવરમાં સામેલ છે અને લગભગ તમામ વીમા કંપનીઓ આવી પૉલિસી વેચે છે.
નીતિ આયોગનો રિપોર્ટ
વર્ષ 2021નો નીતિ આયોગનો રિપોર્ટ કહે છે કે, ભારતનાં મોટા ભાગનાં પરિવારો હોસ્પિટલમાં દાખલ થવાના ખર્ચથી નહીં.., પણ OPD ખર્ચને કારણે આર્થિક ભીંસનો સામનો કરે છે. 80થી 85 ટકા પરિવારના આર્થિક સંકટનું કારણ OPD ખર્ચ હોય છે જ્યારે IPD ખર્ચને કારણે 45થી 50 ટકા પરિવાર મુસીબતનો સામનો કરે છે. દેશની 30 ટકા વસતિ એટલે કે, લગભગ ચાલીસ કરોડ લોકો પાસે કોઈ હેલ્થ પ્રોટેક્શન કવર પણ નથી.
OPD ખર્ચ
અમુક વીમા કંપનીઓ બેઝિક પૉલિસી પ્લાનની સાથે અથવા તો એડ-ઓન સ્વરૂપે OPD કવર આપે છે. મોટા ભાગની પૉલિસીમાં વેઈટિંગ પીરિયડ પછી OPD કવર મળે છે. ધારો કે, વેઈટિંગ પીરિયડ 90 દિવસનો હોય તો પૉલિસી લીધાના 90 દિવસ પછી OPD ખર્ચનો ક્લેમ કરી શકશો. જોકે, OPD ખર્ચ માટે પૂરેપૂરા સમ ઈન્સ્યૉર્ડનો ક્લેમ કરી શકાતો નથી, કારણ કે, પૉલિસીમાં OPD ખર્ચની એક મર્યાદા નક્કી થયેલી હોય છે. એટલે, સમ ઈન્સ્યૉર્ડમાં આ મર્યાદાથી વધારે રકમનો OPD ખર્ચ ક્લેમ કરી શકાતો નથી.
કેશલેસ OPD
હેલ્થ ઈન્સ્યૉરન્સ પૉલિસીમાં કેશલેસ OPDની સુવિધા મળે છે, તેના માટે કંપનીના નેટવર્કમાં સામેલ હોય તેવી હોસ્પિટલમાં જવું પડશે. આ સુવિધા હેઠળ ડૉક્ટરની ફી, ટેસ્ટ અને દવા માટે તમારે ખિસ્સામાંથી પૈસા નહીં કાઢવા પડે. જોકે, મોટા ભાગનાં લોકો બીમાર પડે એટલે પોતાની નજીકના ડૉક્ટરને બતાવી દે છે.
OPD કવરમાં કયા ખર્ચા સામેલ નથી?
– કૉસ્મેટિક અથવા પ્લાસ્ટિક સર્જરી
– વ્યસનમુક્તિ, પ્રેગ્નન્સી, વાંજિયાપણાની સારવાર
– સર્જરી બાદ ઘરમાં ઉપયોગમાં લેવાતા લેન્સ, હિયરિંગ એઈડ જેવા મેડિકલ ડિવાઈસ
– વીમા કંપનીના નેટવર્કમાં સામેલ ના હોય તેવી હોસ્પિટલમાં લીધેલી સારવાર
OPD કવર આપતી આરોગ્ય વીમા પૉલિસીઓ
– Niva Bupa Go Activeનું વાર્ષિક પ્રીમિયમ છે 13,352 રૂપિયા. તેનું સમ ઈન્સ્યૉર્ડ છે 4થી 25 લાખ રૂપિયા. તેમાં એક વર્ષમાં મહત્તમ 10 OPD કન્સલ્ટેશનનું કવર મળે છે.
– Bajaj Allianz Tax Gainમાં 1 લાખ સમ ઈન્સ્યૉર્ડનું પ્રીમિયમ છે 2,900 રૂપિયા જ્યારે 3 લાખ સમ ઈન્સ્યૉર્ડનું પ્રીમિયમ છે 7,500 રૂપિયા. જો નેટવર્ક હોસ્પિટલમાં સારવાર નહીં લીધી હોય તો વીમાધારકે 10 ટકા કો-પેમેન્ટ કરવું પડશે.
– Digit Care plus OPD Insurance Planમાં 2 પુખ્ત વયના અને 2 બાળક, એમ પ્રત્યેકને 5 લાખ સુધીનું કવર મળે છે. તેનું પ્રીમિયમ છે 21,713 રૂપિયા. આ પ્લાનમાં ચશ્મા, કોન્ટેક્ટ લેન્સ, બીપી મોનીટર જેવા ખર્ચનું કવર મળતું નથી.
– Star Outpatient Care Health Insurance Planમાં 50 હજાર રૂપિયા સમ ઈન્સ્યૉર્ડનું પ્રીમિયમ 8,080 રૂપિયા જ્યારે 1 લાખ રૂપિયાના સમ ઈન્સ્યૉર્ડનું પ્રીમિયમ 12,565 રૂપિયા છે. તેમાં ડેન્ટલ, યુનાની અને આયુર્વેદ સારવારનું કવર મળે છે.
OPD કવરનું મહત્ત્વ
હેલ્થ ઈન્સ્યૉરન્સ પૉલિસીમાં OPD કવર એક મહત્ત્વનો ભાગ છે. ખાસ તો એવા લોકો માટે જેમણે નિયમિતપણે તબીબી સારવાર લેવી પડે છે. જો ગોવિંદે હેલ્થ ઈન્સ્યૉરન્સ લીધું હોત તો, કદાચ આર્થિક મુશ્કેલીથી બચી ગયો હોત. પણ પૉલિસી લેતી વખતે તમારે નિયમો અને શરતો, તેમાં સામેલ ફાયદા અને કઈ-કઈ વસ્તુઓનું કવર મળે છે તેની જાણકારી મેળવવી જોઈએ. અને હા, હેલ્થ ઈન્સ્યૉરન્સ તમને ટેક્સ બચાવવામાં પણ મદદ કરે છે. તમે સેક્શન 80D હેઠળ પોતાના અને પરિવારના મેડિકલ ઈન્સ્યૉરન્સ માટે ચૂકવેલા 25 હજાર રૂપિયાના પ્રીમિયમ પર કરકપાત માંગી શકો છો.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો