Money9: યુટ્યુબ પર વીડિયો લાઈક કરવા, સોશિયલ મીડિયામાં પોસ્ટ લાઈક કરવાની નોકરીના નામે તો છેતરપિંડી થતી જ હતી હવે વધુ એક વર્ક ફ્રોમ હોમનું કૌભાંડ ઝડપથી ફેલાઈ રહ્યું છે. અભિનવ આવી જ એક છેતરપિંડીનો શિકાર બન્યો. શું થયું અભિનવ સાથે.. સૌથી પહેલા તે જાણીએ.
વાસ્તવમાં અભિનવને વોટ્સએપ પર અજાણ્યા નંબર પરથી કોલ આવ્યો હતો. કોલમાં એક જાણીતી ઈ-કોમર્સ સાઈટમાં પાર્ટ ટાઈમ જોબની ઓફર હતી. અભિનવને કહેવામાં આવ્યું કે તેનું કામ ખૂબ જ સહેલું હશે. તેણે માત્ર અમુક પ્રોડક્ટ્સના વેચાણ અને રેન્કિંગમાં વધારો કરવાનું કામ કરવાનું છે. સાઇટ પર બનાવેલા વૉલેટમાં પૈસા આવશે. અભિનવે ઓફર સ્વીકારી લીધી. હવે વોલેટમાં પૈસા પણ આવવા લાગ્યા પરંતુ એક સર્ટેન એમાઉન્ટ થયા પછી જ તે પૈસા ઉપાડી શકશે, એવું નોટિફિકેશન પણ આવવા લાગ્યું. આ રીતે અભિનવના અંદાજે 1 લાખ રૂપિયા થઇ ગયા. ત્યારબાદ અભિનવને 10,000 રૂપિયા જમા કરાવવાનું કહેવામાં આવ્યું.
અભિનવને કહેવામાં આવ્યું કે આ કોઇ ફી છે. ત્યારબાદ જ તે વોલેટમાં પડેલા પોતાના પૈસા ઉપાડી શકશે. આ પૈસા પાછળથી પાછા મળી જશે. અભિનવે આ પૈસા આપી દીધા પરંતુ ત્યારબાદ પણ એ સેલેરી ન આવી જે વોલેટમાં દેખાતી હતી. જે લોકોને નોકરી માટે કોલ આવ્યો હતો તેમને ફોન કરવાનો પ્રયાસ કર્યો, પરંતુ હવે તેઓ ક્યાં મળવાના હતા.. અભિનવ સાથે જે થયું તેને જ ઈ-કોમર્સ સાઈટ જોબ ફ્રોડ કહેવામાં આવે છે.
એક રિપોર્ટ અનુસાર, ઈ-કોમર્સ સાઈટ જોબ ફ્રોડના તાર વિદેશો સાથે જોડાયેલા છે. ચીન, હોંગકોંગ અને થાઈલેન્ડ જેવા દેશોમાંથી છેતરપિંડી થઈ રહી છે. ચીની કંપનીઓ આ છેતરપિંડી તેમના ભારતીય એજન્ટો દ્વારા કરી રહી છે.
છેલ્લા કેટલાક સમયથી સરકાર ચાઈનીઝ એપ્સ પર સતત પ્રતિબંધ લગાવી રહી છે. ત્યારે હવે ચાઈનીઝ ઠગો જાણીતી ઈ-કોમર્સ સાઈટ્સનો સહારો લઈને લોકો સાથે છેતરીપિંડી કરી રહ્યા છે. છેલ્લા કેટલાક મહિનામાં એકલા દિલ્હીમાં પોલીસ પાસે આવી લગભગ ડઝનેક ફરિયાદો આવી છે.
હવે જાણીએ આ નવી જોબ ફ્રોડની રીત શું છે?
ઠગો ઘણી પ્રખ્યાત ઈ-કોમર્સ સાઈટ જેવી જ ભળતી સાઈટ બનાવે છે અને લોકોને નોકરીની લાલચ આપે છે. તેઓ ઓટીટી કોમ્યુનિકેશન એપ્સ જેવી કે વોટ્સએપ, ટેલિગ્રામ અથવા એસએમએસ દ્વારા લોકોનો સંપર્ક કરે છે. ત્યારબાદ તેમને આ પ્રકારની નોકરીની ઓફર કરવામાં આવે છે. અભિનવની જેમ લોકોને કહેવામાં આવે છે કે તેમનું કામ ખૂબ જ સરળ છે. માત્ર અમુક પ્રોડક્ટ્સનું વેચાણ અને રેન્કિંગ વધારવામાં મદદ કરવી પડશે. લોકોને સાઇટ પર વર્ક આઈડી બનાવવાનું કહેવામાં આવે છે. આઈડી બનાવ્યા પછી લોકોને ઈ-વોલેટ અસાઇન કરવામાં આવે છે. જેમાં, લોકો તેમના બેલેન્સ, ટાસ્ક, ઓર્ડર, વિડ્રોઅલ, પ્રોડક્ટ્સ સેલિંગ જેવી વસ્તુઓ જોઈ શકે છે. યૂઝર પોતાની ID કે પ્રોફાઇલ પર પ્રોડક્ટનું વેચાણ થતા અને તેમના વૉલેટમાં પૈસા આવતા જોઈ શકે છે. પરંતુ જ્યારે તમે પૈસા ઉપાડવાનો પ્રયાસ કરો છો, ત્યારે બાકીના અન્ય ટાસ્ક દેખાવા લાગે છે. તેને ઉપાડવા માટે, વૉલેટમાં તે ટાસ્કની કિંમત જેટલી રકમ નાંખવાનું કહેવામાં આવે છે, એવું કહેવાય છે કે ટાસ્ક પૂર્ણ થયા બાદ આ રકમ પરત કરવામાં આવશે. પરંતુ લોકો પૈસા જમા કરાવ્યા પછી પણ તેમના વોલેટમાંથી પોતાની સેલેરી નથી ઉપાડી શકતા.
આ સિવાય ઘણી વખત લોકોને કેટલીક ફેક સ્કીમની લિંક પણ મળે છે. મેસેજમાં કહેવામાં આવે છે કે આ એક નફાકારક સ્કીમ છે જે ફક્ત તેમના જેવા કર્મચારીઓ માટે છે. તેમાં રોકાણ કરો. આમાં તમને મોટી રકમ મળશે. પરંતુ પૈસા જમા થતાની સાથે જ ઠગ પૈસા લઈને ગાયબ થઈ જાય છે.
આ પ્રકારની છેતરપિંડીથી કેવી રીતે બચવું તે એક મોટો પ્રશ્ન છે.
આના માટે એ સમજવું જરૂરી છે કે નોકરીના નામે તમારે જાતે પૈસા આપવાની જરૂર નથી. કોઈ જેન્યુઇન કંપની આવા પૈસા નથી લેતી. સોશિયલ મીડિયાનો ઉપયોગ કરતી વખતે સાવધાન રહેવું જોઈએ. જો કોઈ અજાણી વ્યક્તિ કે સાઈટ તમારો સંપર્ક કરે તો ચેતી જાવ.. વોટ્સએપ પર અજાણ્યા નંબરો પરથી કોલ આવે તો ઉપાડશો નહીં.. સાઈટની વિશ્વસનીયતાની તપાસ કરો.
આટલી બધી સાવચેતી રાખવા છતાં, જો તમે છેતરપિંડીની જાળમાં ફસાઈ જાઓ છો, તો તમે ચોક્કસ પૈસા ગુમાવશો.
તો તરત જ નેશનલ સાયબર ક્રાઈમ રિપોર્ટિંગ પોર્ટલ – cybercrime.gov.in પર અથવા ટોલ ફ્રી નેશનલ હેલ્પલાઈન નંબર 1930 પર ફરિયાદ કરો.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો