Money9: શેરબજારનું પ્રાયમરી માર્કેટ એટલે કે IPO માર્કેટ વિશે મોટા સમાચાર છે. હવે IPOમાં નાણાં રોક્યા બાદ રોકાણકારોને શેરના લિસ્ટિંગ માટે વધુ રાહ જોવી પડશે નહીં. માર્કેટ રેગ્યુલેટર સેબીએ બુધવારે પબ્લિક ઈશ્યુ શેરના લિસ્ટિંગ માટેનો સમયગાળો હાલના છ દિવસથી ઘટાડીને ત્રણ દિવસ કરવા સહિતની અનેક દરખાસ્તોને મંજૂરી આપી હતી. રેગ્યુલેટરના આ પગલાથી ઈશ્યુઅર્સને તેમના ફંડ અને એલોટીને સિક્યોરિટી મેળવવામાં લાગતો સમય ઘટશે.
હવે ફક્ત 3 દિવસમાં લિસ્ટ થશે શેર
સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી)ના બોર્ડ ઓફ ડિરેક્ટર્સની બેઠકમાં કુલ સાત દરખાસ્તોને મંજૂરી આપવામાં આવી હતી. નિયમનકારે એક નિવેદનમાં જણાવ્યું હતું કે, “T+3 (ઇશ્યૂ બંધ થયાની તારીખથી ત્રણ દિવસ) દિવસોની સુધારેલી સમયમર્યાદા બે તબક્કામાં લાગુ કરવામાં આવશે. તે 1 સપ્ટેમ્બર, 2023 ના રોજ અથવા તે પછી ખુલતા તમામ પબ્લિક ઇશ્યૂ માટે સ્વૈચ્છિક હશે અને 1 ડિસેમ્બર, 2023 ના રોજ અથવા તે પછી ખુલવાના કિસ્સામાં ફરજિયાત હશે.
ભારત વિશ્વનો પ્રથમ દેશ બનશે
સેબીના ચેરપર્સન માધવી પુરી બુચે જણાવ્યું હતું કે લિસ્ટિંગનો સમય ઘટાડીને ત્રણ દિવસ કરવાનો નિર્ણય “ગ્લોબલ ફર્સ્ટ છે અને મને ખાતરી છે કે તેમાં કોઈ સમસ્યા નહીં હોય કારણ કે બજારના તમામ સહભાગીઓ દ્વારા તેનું પરીક્ષણ કરવામાં આવ્યું છે.” સેબીએ જણાવ્યું કે આ નિર્ણય મોટા રોકાણકારો, રજિસ્ટ્રાર અને ટ્રાન્સફર એજન્ટ્સ, બ્રોકર-ડ્રિસ્ટ્રીબ્યુટર અને બેંકો સહિત તમામ હિતધારકો સાથે ચર્ચા વિચારણા કર્યા બાદ લેવામાં આવ્યો છે.
FPI માટે પણ નવા નિયમો
બોર્ડ ઓફ ડિરેક્ટર્સે જાહેર ઈશ્યુમાં શેરના લિસ્ટિંગ માટેનો સમયગાળો ઈશ્યુના બંધ થવાની તારીખથી હાલના છ દિવસથી ઘટાડીને ત્રણ દિવસ સુધી મંજૂર કર્યો છે. આ સાથે, સેબીએ પારદર્શિતા વધારતા વિદેશી પોર્ટફોલિયો રોકાણકારો (FPIs) ની અમુક શ્રેણીઓ માટે ડિસ્ક્લોઝર આવશ્યકતાઓને વધારવાનો નિર્ણય કર્યો છે. નવા નિયમો FPIs માટે લાગુ થશે જેઓ એક જ કોર્પોરેટ જૂથમાં હિસ્સો કેન્દ્રિત કરે છે. આ પગલાનો હેતુ ભારતીય કંપનીઓને તકવાદી ટેકઓવરના જોખમોથી બચાવવા માટે લઘુત્તમ પબ્લિક શેરહોલ્ડિંગ (MPS) જરૂરિયાતોની સંભવિત હેરફેર અને FPI રૂટના સંભવિત દુરુપયોગને રોકવાનો છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો