Money9: જો તમે ડેટ મ્યુચ્યુઅલ ફંડમાં રોકાણ કરો છો, તો તમને એ ખબર હોવી જોઇએ કે ડેટ ફંડનું રિટર્ન શેના પર આધાર રાખે છે. આ ફંડ્સનું રિટર્ન વ્યાજ દરોના સાયકલમાં થતા ફેરફાર સાથે બદલાતું રહે છે… જો વ્યાજ દરો વધી રહ્યા છે તો ડેટ ફંડ્સનું રિટર્ન ઘટે છે… જ્યારે વ્યાજ દરો ઘટે છે ત્યારે રિટર્ન વધી જાય છે…જો આપણે તાજેતરના સમયની વાત કરીએ તો વ્યાજ દરો સ્થિર છે…આવી પરિસ્થિતિમાં નાણાકીય નિષ્ણાતો જોખમ અને રિટર્નને સંતુલિત કરવા માટે પોર્ટફોલિયોમાં ડાયનેમિક બોન્ડ ફંડને ઉમેરવાની સલાહ આપે છે. ડાયનેમિક બોન્ડ ફંડમાં રિટર્નનું ગણિત સમજતા પહેલા આવો એ જાણીએ કે આ ફંડ શું હોય છે અને તે કામ કેવી રીતે કરે છે.
ડાયનેમિક બોન્ડ ફંડ્સ ડેટ મ્યુચ્યુઅલ ફંડની કેટેગરીમાં આવે છે…જેવું કે નામ પરથી સ્પષ્ટ થાય છે કે આ ફંડ્સને એવી રીતે ડિઝાઇન કરવામાં આવ્યા છે કે ફંડ મેનેજર્સને વ્યાજ દરોમાં ઉતાર-ચડાવ અનુસાર ફેરફાર કરવાની મંજૂરી મળી શકે. ડાયનેમિક બોન્ડ ફંડનો મુખ્ય ઉદ્દેશ્ય ઘટતા અને વધતા એમ બંને પ્રકારના માર્કેટમાંથી મહત્તમ રિટર્ન મેળવવાનો હોય છે. આ ફંડ હેઠળ, ફંડ મેનેજર વ્યાજ દરોમાં થતી વધઘટ અનુસાર પોર્ટફોલિયોમાં ફેરફાર કરતો રહે છે. વ્યાજ દર ગમે તેટલા હોય આનાથી ફંડને બેલેન્સડ રિટર્ન આપાવવામાં મદદ મળે છે.
હવે એ જાણીએ કે ડાયનેમિક બોન્ડ ફંડ કેવી રીતે કામ કરે છે? વાસ્તવમાં, ડાયનેમિક બોન્ડ ફંડમાં એટલી ફ્લેક્સિબિલિટી હોય છે કે જરૂરિયાત પડે ત્યારે તરત જ પોર્ટફોલિયો ફેરફાર થઇ શકે. આમાં ફંડ મેનેજર વ્યાજ દરોના વલણને જાણીને લાંબા, મધ્યમ અને ટૂંકા ગાળાની સિક્યોરિટીઝમાં રોકાણ સ્વિચ કરી શકે છે. જો ફંડ મેનેજરને લાગે કે વ્યાજ દરોમાં ઘટાડો થશે તો તે લોંગ ટર્મ મેચ્યોરિટીવાળી સિક્યોરિટીઝમાં પૈસા લગાવી દે છે જેથી લાંબા ગાળામાં બોન્ડની કિંમતો વધવાનો ફાયદો લઈ શકાય… તેવી જ રીતે, જો ફંડ મેનેજરને લાગે કે વ્યાજ દરો વધશે,તો તે શોર્ટ ટર્મ બોન્ડને પસંદ કરે છે જેથી પોર્ટફોલિયોને નુકસાનથી બચાવી શકાય.
કોઈપણ રોકાણમાં સૌથી મહત્વની વસ્તુ છે રિટર્ન. અલગ અલગ ડાયનેમિક બોન્ડ ફંડનું રિટર્ન અલગ અલગ ટાઇમ પીરિયડમાં કેટલું છે તેના માટે ચાર્ટ તમારી સામે છે. Ace Mutual Fund અનુસાર ડાયનેમિક બોન્ડ ફંડે એક વર્ષમાં 7 ટકા, 3 વર્ષમાં 5 ટકા જ્યારે 5 વર્ષમાં 6 ટકાનું સરેરાશ રિટર્ન આપ્યું છે. આ આંકડા 13 ડિસેમ્બર, 2023 સુધીના છે. ફ્રેન્કલિન ઈન્ડિયા ડાયનેમિક એક્રુઅલ ફંડ આ કેટેગરીની સૌથી જૂની સ્કીમ છે. આ ફંડે છેલ્લા એક વર્ષમાં 31.87 ટકાનું અભૂતપૂર્વ રિટર્ન આપ્યું છે.
ડાયનેમિક બોન્ડ ફંડ્સ પર ડેટ મ્યુચ્યુઅલ ફંડની જેમ ટેક્સ લાગે છે. 1 એપ્રિલ, 2023 પછી ડેટ મ્યુચ્યુઅલ ફંડમાં કરાયેલા રોકાણ પર લોંગ ટર્મ કેપિટલ ગેઇન અને ઇન્ડેક્સેશનનો લાભ નહીં મળે. ડાયનેમિક મ્યુચ્યુઅલ ફંડ્સના વેચાણથી થતો કેપિટલ ગેઇન એટલે કે નફો તમારી આવકમાં ઉમેરાશે. તમારી ઇનકમ જે સ્લેબમાં આવશે તે રેટથી ટેક્સ લાગશે. પછી ભલે તમારો હોલ્ડિંગ પીરિયડ ગમેતેટલો કેમ ન હોય. એટલે કે એપ્રિલ 1, 2023 બાદ ખરીદેલા યૂનિટને વેચાણથી પ્રાપ્ત થયેલો શોર્ટ ટર્મ કેપિટલ ગેઇન માનવામાં આવશે.
જો ડેટ મ્યુચ્યુઅલ ફંડમાં 31 માર્ચ, 2023 ના રોજ અથવા તે પહેલાં રોકાણ કર્યું છે, તો તમને ઇન્ડેક્સેશનનો લાભ મળશે… આ સ્થિતિમાં, જો તમે ડેટ ફંડ યુનિટને 36 મહિનાથી વધુ સમય સુધી રાખ્યા પછી વેચો છો, તો ઈન્ડેક્સેશન બેનિફિટ પછીના નફા પર 20 ટકા લોંગ ટર્મ કેપિટલ ગેઈન ટેક્સ વસૂલવામાં આવશે. જો 36 મહિના પહેલા વેચવામાં આવે તો તેને શોર્ટ ટર્મ કેપિટલ ગેઈન ગણવામાં આવશે અને ટેક્સ સ્લેબ મુજબ નફા પર ટેક્સ લાગશે.
હવે સવાલ એ થાય છે કે શું તમારે ડાયનેમિક બોન્ડ ફંડમાં રોકાણ કરવું જોઈએ? તો તમને જણાવી દઇએ કે ગેરંટેડ રિટર્નવાળી ફિક્સ્ડ ડિપોઝિટની તુલનામાં ડેટ મ્યુચ્યુઅલ ફંડમાં રોકાણ કરવાનો સૌથી મોટો ફાયદો વ્યાજ દરોમાં થતા ફેરફારો અનુસાર તાત્કાલિક પોર્ટફોલિયોમાં ફેરફારનો છે. ડાયનેમિક બોન્ડ ફંડ્સ જેમ કે ડેટ ફંડ વ્યાજ દરો વધવા અને ઘટવા પર પોર્ટફોલિયોમાં તાત્કાલિક ફેરફાર કરે છે. જેનાથી તે રોકાણકારો માટે યોગ્ય વિકલ્પ સાબિત થાય છે.
માર્કેટ એક્સપર્ટ્સ માને છે કે હાલ વ્યાજ દરો ઘણાં ઊંચા છે ત્યારે ડાયનેમિક બોન્ડ ફંડ ભવિષ્યમાં વ્યાજ દરોમાં ઘટાડાનો લાભ મેળવવાની સ્થિતિમાં છે. આવતા એક કે બે વર્ષની અંદર જેમ જેમ ફુગાવો અંકુશમાં આવતો જશે તેમ તેમ વ્યાજ દરો નીચે આવવા લાગશે. જેનો ફાયદો ડાયનેમિક બોન્ડ ફંડ ઉઠાવી શકશે. રોકાણ માટે 2 થી 3 વર્ષનો ટાઇમ પીરિયડ લઇને ચાલતા રોકાણકારો ફિકસ્ડ ઇનકમ માટે તેમના મ્યુચ્યુઅલ ફંડ પોર્ટફોલિયોમાં ડાયનેમિક બોન્ડ ફંડનો સમાવેશ કરી શકે છે… ડાયનેમિક બોન્ડ ફંડ બજારની બદલાતી પરિસ્થિતિઓના પ્રમાણે તેમના પોર્ટફોલિયોમાં ફેરફાર કરવાની ફ્લેક્સિબિલિટી ધરાવે છે. જે તેમને ઉતાર-ચડાવ ભર્યા આર્થિક વાતાવરણમાં લાંબા ગાળા માટે રોકાણ કરનારા માટે અનુકૂળ બનાવે છે.
રોકાણકારો તરીકે, લોકોને ઘણી વાર એવી ગેરસમજ હોય છે કે ડેટ મ્યુચ્યુઅલ ફંડમાંથી ફાયદો ત્યારે જ મળી શકે છે જ્યારે વ્યાજ દર ઘટી રહ્યા હોય. જો કે, હકીકત એ છે કે ડાયનેમિક બોન્ડ ફંડ તમારા પોર્ટફોલિયો માટે ઓલ સીઝન યોગ્ય સાબિત થઈ શકે છે. વ્યાજ વધે કે ઘટે..આ બન્ને સ્થિતિમાં ફાયદો કરાવી શકે છે. અત્યારે વ્યાજદરો જે લેવલે છે રોકાણકાર જુદા જુદા ડેટ ફંડમાં નાણાંનું રોકાણ કરીને બજારના ઉતાર-ચડાવ સાથે સંકળાયેલા જોખમોને ઘટાડીને ફાયદો ઉઠાવી શકે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો