Money9 Gujarati:
તમે ICICI બેન્કના ગ્રાહક છો? તો ઓનલાઈન બેન્કિંગ પોર્ટલ પર અથવા મોબાઈલ એપ્લીકેશનમાં ચેક કરી લેજો, કોઈ અન્ય વ્યક્તિનું ક્રેડિટ કાર્ડ તમારા એકાઉન્ટ સાથે લિન્ક તો નથી થઈ ગયું ને? કારણ કે, ICICI બેન્કમાં એક ગંભીર ટેકનીકલ એરર થઈ છે. તાજેતરમાં ઈશ્યૂ થયેલા 17 હજાર ક્રેડિટ કાર્ડનો ડેટા બેન્કના અન્ય ગ્રાહકો સાથે લિન્ક થઈ ગયો છે. આ ભૂલ ધ્યાને આવતાંની સાથે જ, ICICI બેન્કે 17 હજાર ક્રેડિટ કાર્ડ બ્લોક કરી દીધા છે. ICICI બેન્ક ભારતની બીજા ક્રમની ખાનગી બેન્ક છે અને તેણે સ્વીકાર્યું છે કે, આ સમસ્યા ઉકેલાઈ ગઈ છે અને કોઈના પણ ક્રેડિટ કાર્ડનો દુરુપયોગ થયો નથી. જો બેન્કની ભૂલના કારણે કોઈને આર્થિક નુકસાન પહોંચ્યુ હશે તો બેન્ક તેની ભરપાઈ કરવાનું વચન આપે છે.
ICICI બેંકના પ્રવક્તાએ જણાવ્યું હતું કે આ સમસ્યાથી પ્રભાવિત ક્રેડિટ કાર્ડ વપરાશકર્તાઓ તેના કુલ કાર્ડ પોર્ટફોલિયોના માત્ર 0.1 ટકા છે. આ તમામ કાર્ડ બ્લોક કરી દેવામાં આવ્યા છે અને ગ્રાહકોને નવા કાર્ડ આપવામાં આવશે. એટલું જ નહીં, જો બેંકમાં દુરુપયોગનો કોઈ મામલો પ્રકાશમાં આવશે તો યુઝર્સને વળતર પણ આપવામાં આવશે.
બેંકના નવા ગ્રાહકોના ક્રેડિટ કાર્ડ નંબર ભૂલથી કેટલાક જૂના ગ્રાહકોના કાર્ડ સાથે લિંક થઈ ગયા છે. આ ખામીને કારણે, પસંદ કરેલા જૂના ગ્રાહકોએ બેંકની મોબાઇલ એપ્લિકેશન પર નવા કાર્ડધારકોની સંપૂર્ણ વિગતો જોવાનું શરૂ કર્યું હોવાના પણ મેસેજ મળ્યા છે.
બેંકની આ ભૂલની સોશિયલ મીડિયા પર પણ ચર્ચા થઈ હતી. જો કે બેંકે હવે તેને સુધારી લીધો છે. સૂત્રોનું કહેવું છે કે ખોટા ‘મેપિંગ’ના કારણે બેંકના જૂના યુઝર્સ નવા ક્રેડિટ કાર્ડ ગ્રાહક વિશે સંપૂર્ણ માહિતી જોઈ શક્યા હતા. જો કે, કેટલાક નિષ્ણાતો માને છે કે ખોટી મેપિંગ હોવા છતાં, ક્રેડિટ કાર્ડ ટ્રાન્ઝેક્શન થવાની શક્યતા ઘણી ઓછી છે કારણ કે કોઈપણ ભારતીય ઑનલાઇન વેબસાઇટ નવા ગ્રાહકના મોબાઇલ ફોન પર વન-ટાઇમ પાસવર્ડ (OTP) માંગે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો