Money9: દિવાળીની ખરીદી માટે બજારો શણગાર સજીને તૈયાર થઇ ગયા છે. ગ્રાહકોને રીઝવવા માટે બજારમાં ઓફરોનો ધમધમાટ છે. ઓનલાઈન અને ઓફલાઈન બંનેમાં પુષ્કળ ઓફર્સ અને ડિસ્કાઉન્ટ છે. કેટલાક લોકો ઑફર્સની લાલચમાં, આડેધડ ખરીદી કરે છે પરંતુ જ્યારે ક્રેડિટ કાર્ડનું બિલ આવે છે ત્યારે અફસોસ થાય છે. જો આ બિલ સમયસર ચૂકવવામાં ન આવે તો તમે દેવામાં ફસાઈ શકો છો. પરંતુ તમારે આનાથી ડરવાની જરૂર નથી. જો તમે સમજી વિચારીને ખરીદી કરો તો તમે તમારા ક્રેડિટ કાર્ડથી મહત્તમ લાભ મેળવી શકો છો. તહેવારોની સિઝનમાં ક્રેડિટ કાર્ડનો યોગ્ય રીતે ઉપયોગ કેવી રીતે કરવો? આવો સમજીએ-
બિલિંગ સાયકલને સમજો
જો તમે ક્રેડિટ કાર્ડથી ખરીદી કરો છો, તો તમને 50 દિવસ માટે વ્યાજમુક્ત ચુકવણીનો વિકલ્પ મળે છે. આ સુવિધા મેળવવા માટે, તમારે બિલિંગ સાયકલને સમજવી પડશે. ઉદાહરણ તરીકે, તમારા કાર્ડની બિલિંગ સાયકલ 1 થી 31મી તારીખ સુધીની છે. હવે જો તમે નવેમ્બર મહિના દરમિયાન ખરીદી કરો છો, તો 1લી ડિસેમ્બરે એક બિલ જનરેટ થશે જેને તમે 20 ડિસેમ્બર સુધી ચૂકવી શકશો. આવી સ્થિતિમાં, જો તમે નવેમ્બરના પહેલા અઠવાડિયામાં ખરીદી કરો છો, તો તમને વધુ દિવસો માટે વ્યાજ મુક્ત સુવિધાનો લાભ મળશે. જો તમે 30મી નવેમ્બરે શોપિંગ કરશો તો વ્યાજમુક્ત બાકી બિલ ચૂકવવા માટે માત્ર 20 દિવસ જ મળશે.
જો તમને તહેવારોની સિઝનમાં બમ્પર ડિસ્કાઉન્ટ અથવા કેશબેકનો લાભ મળી રહ્યો હોય, તો આવી ઑફર્સનો લાભ લેવાાં સમજદારી છે. પરંતુ તમારા ક્રેડિટ કાર્ડના ખર્ચને મર્યાદિત રાખો. કાર્ડના ક્રેડિટ યૂટિલાઇઝેશન રેટ એટલે કે CUR પર નજર રાખો. CUR તમારી ક્રેડિટ મર્યાદાની ટકાવારીને દર્શાવે છે. નિષ્ણાતોના મતે, 30 ટકા સુધીનો CUR આદર્શ માનવામાં આવે છે. ઉદાહરણ તરીકે, જો તમારા કાર્ડની મર્યાદા 1 લાખ રૂપિયા છે તો તમારે 30 હજાર રૂપિયા સુધીનો ખર્ચ કરવો જોઈએ. આનાથી વધુ ખર્ચ કરશો તો તમારા ક્રેડિટ સ્કોરને નુકસાન થઈ શકે છે. જો તમારો CUR 30 ટકા અથવા તેનાથી ઉપર જઈ રહ્યો છે તો કાર્ડની મર્યાદા વધારવી જોઈએ.
કેશબેક અને રિવોર્ડ પોઈન્ટનો લાભ
દિવાળીમાં ક્રેડિટ કાર્ડ્સ પર બમ્પર ડિસ્કાઉન્ટ અને કેશબેક મળે છે. પરંતુ એ વાતું ધ્યાન રાખો કે આ ઑફર્સ દરેક પ્રોડક્ટ પર નથી મળતી. સામાન્ય રીતે કેશબેક એક ચોક્કસ મર્યાદાથી વધુની ખરીદી પર જ મળે છે. કેટલીકવાર કેશબેકની મહત્તમ મર્યાદા નક્કી કરવામાં આવે છે. ઉદાહરણ તરીકે, કાર્ડમાંથી કોઇ ઈ-કોમર્સની વેબસાઈટ પર 10 ટકા કેશબેકની ઓફર છે, પરંતુ તેની શરતોમાં મહત્તમ રૂ. 500ની શરત જોડાયેલી હોઈ શકે છે. આવી સ્થિતિમાં, ડિસ્કાઉન્ટ અને કેશબેક ઓફરને સમજી લો. કેશબેક અને ડિસ્કાઉન્ટની લાલચમાં આવીને બિનજરૂરી શોપિંગ કરવાનું ટાળો.
નો કોસ્ટ EMIનું ગણિત સમજો
તહેવારોની સિઝનમાં નો કોસ્ટ EMIની ઓફર ગ્રાહકોને સૌથી વધુ આકર્ષે છે. આમાં, ગ્રાહકને કોઇ પ્રોડક્ટ ખરીદ્યા બાદ તેની ચુકવણી સમાન હપ્તામાં કરવાનો વિકલ્પ મળે છે. પરંતુ આ સુવિધા જેટલી સારી દેખાય છે, હકીકતમાં એટલી છે નહીં. આ વિકલ્પનો ઉપયોગ કરવાથી તમને રોકડમાં ખરીદી પર જે ડિસ્કાઉન્ટ મળે છે તેવા ઘણા લાભોથી વંચિત રહી શકો છો. ઉપરાંત, ફાઇલ ચાર્જના નામે તમારી પાસેથી સારી એવી રકમ વસૂલવામાં આવી શકે છે. આ રીતે, નો કોસ્ટ EMI ની સુવિધા તમારા માટે ઘણી મોંઘી સાબિત થઈ શકે છે. તેથી, ખરીદી કરતા પહેલા, નો કોસ્ટ EMI ના ફાયદા અને ગેરફાયદા વિશે સારી રીતે સમજો.
ક્રેડિટ કાર્ડમાં પણ રોકડ ઉપાડની સુવિધા પણ મળે છે. તેમાંથી કેટલા પૈસા ઉપાડી શકાય તે કાર્ડની મર્યાદાના આધારે નક્કી કરવામાં આવે છે. જ્યારે તમે એટીએમમાંથી ક્રેડિટ કાર્ડ દ્વારા રોકડ ઉપાડો છો, ત્યારે તેને ચૂકવવા માટે કોઈ ઇન્ટરેસ્ટ ફ્રી પીરિયડ નહીં મળે.આ રકમ પર પહેલા દિવસથી જ વ્યાજ લાગવાનું શરૂ થઈ શકે છે. વ્યાજ દર મહિને 2 થી 3 ટકા સુધીનો હોઇ શકે છે. બેંકો આ સુવિધાનો ઉપયોગ કરવા માટે ફી પણ વસૂલ કરે છે, જે ઓછામાં ઓછી 250 રૂપિયા હોઈ શકે છે. આ ફી પર 18 ટકા GST પણ ભરવો પડશે. આ રીતે આ લોન ઘણી મોંઘી થઈ જાય છે. તેથી ક્રેડિટ કાર્ડમાંથી રોકડ ઉપાડ ટાળવાનો પ્રયાસ કરો.
આ રીતે, શોપિંગ અને બિલ પેમેન્ટ માટે ક્રેડિટ કાર્ડ એક સારો વિકલ્પ છે. પરંતુ તેનો ફાયદો ત્યાં સુધી છે જ્યાં સુધી તમે ડિસિપ્લિનમાં રહીને તેનો ઉપયોગ કરો. દર મહિને સમયસર બિલની ચૂકવણી કરો. આ બાબતમાં થોડીક પણ બેદરકારી તમને દેવાની જાળમાં ફસાવી શકે છે.
પર્સનલ ફાઇનાન્સ અંગે લેટેસ્ટ અપડેટ મેળવવા માટે Money9 App ડાઉનલોડ કરો