એગ્રેસિવ હાઈબ્રીડ મ્યુચ્યુઅલ ફંડ્સમાં કેમ મળી રહ્યું છે વધારે વળતર?

• Follow

Money9 Gujarati:

પોતાના આર્થિક હેતુઓ પાર પાડવા માટે મ્યુચ્યુઅલ ફંડ્સમાં રોકાણ કરતી વખતે રોકાણકારે વધારે પડતી આક્રમકતા કે સલામતી ન રાખવી જોઈએ. રોકાણકારે આક્રમકતા અને સલામતી વચ્ચે સમતોલન સાધીને રોકાણ કરવું જરૂરી છે અને તેના માટે હાઈબ્રીડ મ્યુચ્યુઅલ ફંડ (hybrid mutual fund) એક સારો વિકલ્પ બની શકે છે.

જો તમે ડેટ ફંડ કરતાં વધારે વળતર મેળવવા માંગતા હોવ પણ સાથે સાથે ઈક્વિટી ફંડ જેવું જોખમ ના લેવું હોય તો તમારા માટે હાઈબ્રીડ ફંડ એક સારો વિકલ્પ છે, જેના દ્વારા તમે આર્થિક હેતુઓ પાર પાડી શકો છો.

હાઈબ્રીડ ફંડમાં એક કેટેગરી છે એગ્રેસિવ હાઈબ્રીડ ફંડ (Aggressive Hybrid fund). અન્ય પાંચ હાઈબ્રીડ કેટેગરીની તુલનાએ એગ્રેસિવ હાઈબ્રીડ ફંડમાં વધારે વળતર મળ્યું છે. 27 ઓક્ટોબર, 2023 સુધીની માહિતી પ્રમાણે, છેલ્લાં 3 વર્ષમાં એગ્રેસિવ હાઈબ્રીડ ફંડમાં 17 ટકા, 5 વર્ષમાં 13 ટકા અને 10 વર્ષમાં 13.4 ટકા વળતર મળ્યું છે.

હવે સવાલ એ થાય કે, એગ્રેસિવ હાઈબ્રીડ ફંડ્સમાં શા માટે વધારે વળતર આપે છે? આ સવાલનો જવાબ જાણવા માટે સૌથી પહેલાં તો એ સમજીએ કે એગ્રેસિવ હાઈબ્રીડ ફંડ શું છે?

એગ્રેસિવ હાઈબ્રીડ મ્યુચ્યુઅલ ફંડ્સ એટલે શું?

સેબીના નિયમ પ્રમાણે, એગ્રેસિવ હાઈબ્રીડ ફંડ્સે ઈક્વિટીમાં અને ઈક્વિટી-સંબંધિત સાધનોમાં 65 ટકાથી 85 ટકા જ્યારે ડેટ સાધનોમાં 20 ટકાથી 35 ટકા રોકાણ કરવું જરૂરી છે. એગ્રેસિવ હાઈબ્રીડ ફંડ્સ એટલે ઈક્વિટી અને ડેટમાં રોકાણ વચ્ચે સમતોલન રાખીને રોકાણ કરતા હોય તેવા બેલેન્સ્ડ ફંડ્સ. એગ્રેસિવ હાઈબ્રીડ ફંડ્સ મુખ્યત્વે સ્ટોક્સમાં રોકાણ કરે છે જ્યારે અમુક રોકાણ FD જેવા સાધનોમાં કરે છે. માત્ર ઈક્વિટી ફંડ્સની તુલનાએ આ ફંડ્સમાં જોખમ ઓછું હોય છે, પરંતુ લાંબા ગાળે વળતર ઈક્વિટી ફંડ્સ જેવું જ મળે છે.

એગ્રેસિવ હાઈબ્રીડ ફંડ્સના ફાયદા

– 75% સુધી રોકાણ સ્ટોક્સમાં કરતા હોવાથી તમારા રોકાણને વૃદ્ધિમય રાખવામાં મદદ મળે છે

– 25% સુધીનું રોકાણ FD જેવા સાધનોમાં કરે છે, એટલે શેરબજાર ઘટે ત્યારે તમારા રોકાણને સલામતી મળે છે

ટેક્સના નિયમ

એગ્રેસિવ હાઈબ્રીડ ફંડ્સને ટેક્સ માટે ઈક્વિટી ફંડ્સ હેઠળ મૂકવામાં આવે છે અને આથી, ઈક્વિટી ફંડ્સ માટે ટેક્સના જે નિયમ છે તે જ નિયમ આ ફંડ્સને પણ લાગુ પડે છે. જો તમે 1 વર્ષ પહેલાં તમારા યુનિટ રીડિમ કરશો તો 15 ટકા ટેક્સ લાગશે. એક વર્ષ બાદ રીડિમ કરશો તો એક નાણાકીય વર્ષમાં 1 લાખ રૂપિયાથી વધારે રિટર્ન પર તમારે 10 ટકા લોંગ-ટર્મ કેપિટલ ગેઈન ટેક્સ આપવો પડશે.

જોખમ

વૈશ્વિક સ્તરે અનિશ્ચિતતાનો માહોલ છે અને ઈમર્જિંગ માર્કેટ્સ તથા અન્ય વિકસિત માર્કેટ્સની તુલનાએ ભારતીય અર્થતંત્ર મજબૂત પ્રદર્શન કરી રહ્યું છે. ભારત માટે લાંબા ગાળાનો અંદાજ સારો છે. આથી, ભારતનાં ઈક્વિટી માર્કેટ્સમાં તેજી જળવાઈ રહેવાની શક્યતા છે. પરંતુ કોઈ પણ ફાયનાન્શિયલ પ્રોડક્ટ્સ જોખમ-મુક્ત હોતી નથી, તેવી જ રીતે એગ્રેસિવ હાઈબ્રીડ ફંડ્સ પણ જોખમમુક્ત નથી.

રોકાણકારે શું કરવું જોઈએ?

જે રોકાણકાર તેમના આર્થિક લક્ષ્યાંકની નજીક પહોંચી ગયા છે અને જે રોકાણકાર વધારે જોખમ લઈ શકે એમ નથી, તેમણે ઊંચા જોખમ (સ્મોલ કેપ અને મિડ કેપ ફંડ્સ) ધરાવતા સાધનોમાંથી રોકાણ કાઢીને એગ્રેસિવ હાઈબ્રીડ ફંડ્સ જેવા પ્રમાણમાં સલામત સાધનોમાં મૂકવું જોઈએ.

ઈક્વિટી માર્કેટ્સ અત્યારે ઊંચી સપાટી પર છે, આથી રોકાણકારે ઓછામાં ઓછા 3 વર્ષનો સમયગાળો ધ્યાનમાં રાખીને આ ફંડ્સમાં રોકાણ કરવું જોઈએ.

એગ્રેસિવ હાઈબ્રીડ ફંડ્સમાં ડેટની સાથે સાથે ઈક્વિટી પણ સામેલ છે, એટલે આ પ્રોડક્ટ થોડીક-જોખમી કેટેગરીમાં આવે છે. માત્ર ઈક્વિટી ફંડ્સની NAV (નેટ એસેટ વેલ્યુ)ની તુલનાએ આ ફંડ્સમાં ઓછો ઉતારચઢાવ જોવા મળે છે. પરંતુ જો તેનો ફંડ મેનેજર ખરાબ ક્વોલિટીના ડેટ સાધનોમાં અને સ્મોલ કેપ ઈક્વિટીઝ જેવા અતિ જોખમી સાધનોમાં રોકાણ કરે તો આ ફંડ વધારે જોખમી બની શકે છે. આથી, રોકાણકારે પોતાની જોખમ લેવાની ક્ષમતાના આધારે અને લાંબા ગાળાની વ્યૂહરચના હોય તો જ એગ્રેસિવ હાઈબ્રીડ ફંડ્સ પસંદ કરવા જોઈએ. રોકાણકારે કોઈ પણ નિર્ણય લેતાં પહેલાં તે પ્રોડક્ટની પૂરેપૂરી સમજ કેળવવી જરૂરી છે. જો રોકાણ કરવા અંગે કોઈ પણ પ્રકારની મૂંઝવણ હોય તો આર્થિક સલાહકારનો સંપર્ક કરીને પછી જ નિર્ણય લેવો જોઈએ.