મની ટાઈમ બુલેટિનઃ વાંચો ગુજરાતમાં ખેતમજૂરીની, અલ નીનોની અસરની અને જિયોના લેપટોપની ખબર

• Follow

ગુજરાતમાં ખેતમજૂરોને મળે છે નજીવું વેતન

મધ્ય પ્રદેશ અને ગુજરાતનાં ગ્રામ્ય ખેતમજૂરોને સાવ નજીવું વેતન મળે છે. RBIના આંકડા પ્રમાણે, નાણાકીય વર્ષ 2022-23માં આ બંને રાજ્યમાં રાષ્ટ્રીય સરેરાશ કરતાં પણ ઓછું વળતર મળ્યું હતું. આ વર્ષની રાષ્ટ્રીય સરેરાશ 345 રૂપિયા હતી, જેની સામે મધ્ય પ્રદેશમાં ખેતમજૂરને દૈનિક 229 રૂપિયા જ્યારે ગુજરાતમાં 241 રૂપિયા મળ્યાં હતાં. તેની સામે કેરળના ગ્રામ્ય ખેતમજૂરને સૌથી વધુ 764 રૂપિયા મળ્યાં હતા. યુપીમાં ખેતમજૂરીનો દર 309 રૂપિયા જ્યારે ઓડિશામાં 285 રૂપિયા રહ્યો હતો. મહારાષ્ટ્રના ખેતમજૂરને ગયા નાણાકીય વર્ષમાં દૈનિક 303 રૂપિયા મળ્યાં હતા. RBIના ડેટા પ્રમાણે, ખેતીવાડી સિવાયનું કામ કરનારા મજૂરને પણ આ બંને રાજ્યમાં રાષ્ટ્રીય સરેરાશ કરતાં ઓછું વેતન મળે છે. કન્સ્ટ્રક્શન વર્કરને પણ બંને રાજ્યમાં ઓછું વેતન મળે છે.

વિએતનામ પણ આપશે વિઝા વગર એન્ટ્રી…!

શ્રીલંકા અને થાઈલેન્ડ બાદ હવે વિએતનામ પણ ભારતનાં પ્રવાસીને વિઝા વગર એન્ટ્રી આપે તેવી શક્યતા છે. અત્યારે જર્મની, ફ્રાન્સ, ઈટલી, સ્પેન, ડેનમાર્ક, સ્વીડન અને ફિનલેન્ડના પ્રવાસી વિઝા વગર વિએતનામમાં પ્રવેશી શકે છે. વિએતનામ સરકાર હવે ભારત અને ચીનના પ્રવાસીને પણ વિઝા વગર પ્રવેશ આપવા અંગે વિચારી રહી છે. જો આવું થશે તો, ભારતીય પ્રવાસીના લગભગ એકવીસ્સોથી ચાર હજાર રૂપિયા બચી જશે. કોરોના બાદ વિએતનામનું આકર્ષણ વધ્યું છે અને 2022માં વિએતનામની મુલાકાત લેનારા ભારતીયોની સંખ્યા 51 ટકા વધીને 81 હજાર થઈ હતી. ચાલુ વર્ષે આ સંખ્યા એકાદ લાખ રહેવાનો અંદાજ છે. લગભગ 1 કરોડ આંતરરાષ્ટ્રીય પ્રવાસીએ 2023ના પ્રથમ 10 મહિનામાં વિએતનામની મુલાકાત લીધી છે.

ખાંડના ભાવ બે મહિનામાં 55% વધ્યા

ખાંડના ભાવ સતત વધી રહ્યાં છે. અલ નીનોને કારણે છેલ્લાં બે મહિનામાં વૈશ્વિક સ્તરે ખાંડની કિંમત 55 ટકા વધી ગઈ છે. વિશ્વને ખાંડની નિકાસમાં બીજું અને ત્રીજું સ્થાન ધરાવતા ભારત અને થાઈલેન્ડમાં શેરડીના પાકને નુકસાન પહોંચ્યું છે. ભારતમાં આ વખતે શેરડીનું ઉત્પાદન 8 ટકા ઘટવાનો જ્યારે થાઈલેન્ડમાં 15 ટકા ઘટવાનો અંદાજ છે. જો વૈશ્વિક સ્તરે શેરડીનું ઉત્પાદન 2 ટકા ઘટશે તો, ખાંડના વૈશ્વિક ઉત્પાદનમાં 35 લાખ ટનનો ઘટાડો થશે, અને ભાવ નવી ટોચે પહોંચી જશે. અત્યારે આંતરરાષ્ટ્રીય બજારમાં ખાંડના ભાવ 2011 પછીના સૌથી ઊંચા સ્તરે પહોંચી ગયા છે. ભારત સરકારે સ્થાનિક સ્તરે ખાંડની કિંમતને અંકુશમાં રાખવા માટે નિકાસ પર પ્રતિબંધ મૂકેલા છે.

ચોકલેટ મોંઘી થશે…?

ચોકલેટ બનાવવામાં સૌથી મહત્ત્વનો કાચો માલ છે કોકો. આફ્રિકામાં ઉત્પન્ન થતા કોકોના ભાવ 46 વર્ષની ટોચે પહોંચી ગયા છે. અલ નીનોની અસર પડવાથી ઘાના અને આઈવરી કૉસ્ટમાં કોકોનું ઉત્પાદન ઘટી ગયું છે. વાયદા બજારમાં એક ટન કોકોની કિંમત 4,000 ડૉલરને પાર થઈ ગઈ છ… ચાલુ વર્ષે કોકોની કિંમત 75 ટકા વધી છે. આફ્રિકાના આઈવરી કૉસ્ટના ખેડૂતોએ પહેલી ઓક્ટોબરથી 12મી નવેમ્બર સુધીમાં 25 ટકા ઓછો સપ્લાય કર્યો છે. વૈશ્વિક સ્તરે કોકોનો સપ્લાય ઘટી ગયો છે અને ડેફિસિટ અઢી વર્ષના તળિયે પહોંચી છે. કોકોના વૈશ્વિક માર્કેટમાં 1.16 લાખ ટન ઘટ છે. કોકો મોંઘો થવાથી ચોકલેટ બનાતી કંપનીઓની પ્રોડક્શન કૉસ્ટ વધી ગઈ છે અને આગામી સમયમાં ચોકલેટ મોંઘી થવાની શક્યતા છે.

લાલ મરચાંની કિંમત 200 રૂપિયા થવાની શક્યતા

સનમ વેરાઈટીનાં લાલ મરચાંના ભાવ કિલોએ 200 રૂપિયાને પાર થઈ શકે છે. ગયા વર્ષે સનમ જાતનાં લાલ મરચાંના ભાવ 175થી 180 રૂપિયા હતા અને આ વખતે લણણીના સમયે કિંમત 200થી 210 રૂપિયાએ પહોંચી જશે. તામિલ નાડુ કૃષિ યુનિવર્સિટીના સંશોધકોએ છેલ્લાં 15 વર્ષને ડેટા ભેગો કરીને આ આગાહી કરી છે. તામિલ નાડુ કૃષિ યુનિવર્સિટીએ ખેડૂતોને સનમ વેરાઈટીનાં મરચાંનું વાવેતર કરવાની સલાહ આપી છે. કૃષિ મંત્રાલયના 2022-23ના પ્રથમ એડવાન્સ અંદાજ મુજબ, લાલ મરચાંનો વિસ્તાર 8.52 લાખ હેક્ટર છે અને ઉત્પાદન 19.58 લાખ ટન રહેવાનો અંદાજ છે.

Jio લાવશે Rs 15,000નું લેપટોપ

મુકેશ અંબાણીની કંપની 15,000 રૂપિયાનું લેપટોપ લાવશે. જિયો ટૂંક સમયમાં એક ક્લાઉડ પીસી લેપટોપ લાવશે અને તેના માટે લેનોવો, એસર અને એચપી જેવી કંપની સાથે વાતચીત ચાલી રહી છે. ક્લાઉડ પીસી માટે HP Chromebook પર ટ્રાયલ ચાલી રહ્યું છે. નવું લેપટોપ ખરીદવું હોય તો ઓછામાં ઓછા 50 હજાર રૂપિયા ખર્ચવા પડે છે, પરંતુ જિયો આ ખર્ચમાં ધરખમ ઘટાડો કરવા માંગે છે. જિયો ક્લાઉડ પર પ્રોસેસિંગ અને સ્ટોરેજ થશે, એટલે ગ્રાહકે પાવરફુલ પ્રોસેસર અને સ્ટોરેજ ખરીદવાનો ખર્ચ નહીં કરવો પડે. જિયો સબ્સક્રિપ્શન પ્લાન લૉન્ચ કરશે, જેના આધારે જિયો ક્લાઉડ પીસી વાપરી શકાશે.